പ്രിയ കുഞ്ഞാക്കൂ...'; പിന്തുണയുമായി മന്ത്രി വി ശിവൻകുട്ടി! കുഞ്ഞാക്കുവിൻ്റെ കുസൃതിയുടെ മേമ്പൊടി ഇഷ്ടപ്പെട്ടുവെന്നും എല്ലാ പിന്തുണയും നൽകുമെന്നും അറിയിച്ചാണ് മന്ത്രി ഫേസ്ബുക്കിലൂടെ രംഗത്തെത്തിയത്. ഇനിയെത്ര ചരിത്രം വഴിമാറാൻ ഇരിക്കുന്നു പ്രിയ കുഞ്ഞാക്കൂ എന്ന് പറഞ്ഞാണ് മന്ത്രിയുടെ പോസ്റ്റ്. സ്വന്തം എസ്എസ്എൽസി വിജയം ആഘോഷിക്കാൻ സ്വയം ഫ്ലക്സു വെച്ചു താരമായ കുഞ്ഞാക്കുവിന് പിന്തുണയുമായ വിദ്യാഭ്യാസ മന്ത്രി വി ശിവൻകുട്ടി. ചിലർ വരുമ്പോൾ ചരിത്രം വഴിമാറുമെന്ന് കുഞ്ഞാക്കു തന്നെ ഫ്ലെക്സിൽ പറയുന്നുണ്ട്. അങ്ങനെയാകട്ടെ എന്ന് ആശംസിക്കുന്നു. ജീവിത പരീക്ഷയിലും മികച്ച വിജയം കുഞ്ഞാക്കുവിനെ തേടിയെത്തട്ടെയെന്നും മന്ത്രി കുറിച്ചു. കൊടുമൺ സ്വദേശിയായ കുഞ്ഞാക്കു എന്ന ജിഷ്ണുവിനെ കുറിച്ചുള്ള വാർത്ത കണ്ടു.
ആ കുസൃതിയുടെ മേമ്പൊടി ഇഷ്ടപ്പെട്ടു. അത് കൊണ്ടാണ് ഈ പോസ്റ്റ്. പഠനവുമായി ബന്ധപ്പെട്ടുള്ള പ്രവർത്തനങ്ങൾക്ക് നമ്മുടെ സംവിധാനം എല്ലാ പിന്തുണയും നൽകും. എസ്എസ്എൽസി പരീക്ഷാഫലം വന്ന് രണ്ടുദിവസം കഴിഞ്ഞപ്പോൾ കൊടുമൺ അങ്ങാടിക്കൽ റോഡിൽ അങ്ങാടിക്കൽ തെക്ക് മണക്കാട്ട് ദേവീ ക്ഷേത്രത്തിനു സമീപം റോഡരികിൽ ഒരു ഫ്ലെക്സ് സ്ഥാപിച്ചാണ് കുഞ്ഞാക്കു സ്വന്തം വിജയം ആഘോഷിച്ചത്. ഇരട്ട സഹോദരി വിഷ്ണു പ്രിയക്കൊപ്പം പത്താം ക്ലാസ് വിജയിച്ചെങ്കിലും മാറാത്ത സങ്കടങ്ങളാണ് ഈ അപൂർവ പ്രചാരണത്തിന് കുഞ്ഞാക്കുവിനെ പ്രേരിപ്പിച്ചത്. സഹപാഠികളിൽ നിന്നും സമൂഹത്തിൽ നിന്നും വളരെയധികം പരിഹാസം നേരിട്ടതിനുള്ള മറുപടി കൂടി ആയിരുന്നു ഫ്ലക്സ് ബോർഡ്.
കൊടുമൺ അങ്ങാടിക്കൽ തെക്ക് മണ്ണമ്പുഴ പടിഞ്ഞാറ്റേതിൽ അരിയംകുളത്ത് ഓമനക്കുട്ടന്റേയും ദീപയുടെയും മകൻ കുഞ്ഞാക്കു എന്ന ജിഷ്ണുവാണ് സമൂഹമാധ്യമങ്ങളിൽ താരമായിരിക്കുന്നത്. എസ്എസ്എൽസി പ്ലസ് ടു പരീക്ഷ ഫലങ്ങൾ വന്നതോടെ എങ്ങും ആഘോഷങ്ങളാണ്. മികച്ച വിജയം സ്വന്തമാക്കിയ പലരുടെയും ഫ്‌ളക്‌സുകൾ നാട്ടിലെങ്ങും ഉയർന്ന് കഴിഞ്ഞു. പ്രധാന കവലകളിൽ എല്ലാം ഉയർന്ന മാർക്ക് വാങ്ങിയ മിടുക്കന്മാരുടെ മിടുക്കികളുടെയും ഫോട്ടോ സഹിതമുള്ള ഫ്‌ളക്‌സുകൾ വയ്ക്കുന്നത് സർവ സാധാരണമാണെന്ന് എല്ലാവർക്കുമറിയാം. പക്ഷെ പത്തനംതിട്ട കൊടുമൺ- അങ്ങാടിക്കൽ റോഡിൽ ഉയർന്ന ഫ്‌ളക്‌സ് കണ്ട് നാട്ടുകാർക്കും സോഷ്യൽ മീഡിയയ്ക്കുമൊന്നും ചിരി അടക്കാൻ സാധിച്ചില്ല.
ക്ലൂളിങ് ഗ്ലാസ് വെച്ചിരിക്കുന്ന ഒരു കൊച്ചു മിടുക്കന്റെ ഫോട്ടോയ്‌ക്കൊപ്പം വെറൈറ്റി ആയിട്ടൊരു തലക്കെട്ടുമായിരുന്നു ഫ്‌ളക്‌സിലുണ്ടായിരുന്നത്. ചിലർ വരുമ്പോൾ ചരിത്രം വഴി മാറും ഇതായിരുന്നു തലക്കെട്ട്. പത്തനംതിട്ട കൊടുമൺ സ്വദേശിയായ ജിഷ്ണു എന്ന കുഞ്ഞാക്കൂ ആണ് എസ്എസ്എൽസി വിജയം ആഘോഷിക്കാൻ സ്വന്തം ഫോട്ടോ വെച്ച് ഫ്‌ളക്‌സ് അടിച്ച് സ്വയം അഭിനന്ദനങ്ങൾ നൽകിയത്. 2022 എസ്എസ്എൽസി പരീക്ഷയിൽ മരണമാസ് വിജയം നേടിയ കുഞ്ഞാക്കു എന്ന എനിക്ക് എന്റെ തന്നെ അഭിനന്ദനങ്ങൾ ഇതായിരുന്നു ഫോട്ടോയുടെ അടിക്കുറിപ്പ്. വെറൈറ്റി ഫ്‌ളക്‌സ് കണ്ട നാട്ടുകാർക്കും ചിരിയും കൗതുകവും അടക്കാൻ ആയില്ലെന്ന് വേണം പറയാൻ.
Find out more:
click and follow Indiaherald WhatsApp channel