കരുനാഗപ്പള്ളിയിലെയും കുണ്ടറയിലെയും തോൽവിക്ക് കാരണമെന്ത്? അക്കമിട്ട് നിരത്തി സിപിഎം! കരുനാഗപ്പള്ളിയിൽ സിറ്റിംഗ് എം. എൽ. എയും സിപിഐ സംസ്ഥാന കൗൺസിൽ അംഗവുമായ ആർ. രാമചന്ദ്രൻ, കുണ്ടറയിൽ സിപിഎം സംസ്ഥാന കമ്മിറ്റി അംഗവും സിറ്റിംഗ് എം. എൽ. എയും മന്ത്രിയും ആയിരുന്ന ജെ. മേഴ്സിക്കുട്ടിഅമ്മ എന്നിവരുടെ തോൽവിയെ കുറിച്ചാണ് സിപിഎം കമ്മീഷനെ നിയോഗിച്ചു അന്വേഷണം നടത്തിയത്. കരുനാഗപ്പള്ളി, കുണ്ടറ നിയമസഭ മണ്ഡലങ്ങളിലെ തോൽവിക്ക് പാർട്ടി നേതാക്കളുടെ വീഴ്ചയും കാരണമായെന്ന് സിപിഎം അന്വേഷണ കമ്മീഷൻ റിപ്പോർട്ട്‌. സിപിഎം സംസ്ഥാന കമ്മിറ്റി അംഗം എസ്. രാജേന്ദ്രൻ കൺവീനറും സംസ്ഥാന കമ്മിറ്റി അംഗം കെ. സോമപ്രസാദ് എം. പി, ജില്ലാ സെക്രട്ടറിയേറ്റ് അംഗം എം. ശിവശങ്കരപ്പിള്ള എന്നിവർ അംഗങ്ങളുമായ അന്വേഷണ കമീഷനാണ് പാർട്ടി ജില്ലാ കമ്മിറ്റിക്ക് റിപ്പോർട്ട്‌ കൈമാറിയത്.
കരുനാഗപ്പള്ളിയിൽ സിപിഐയുടെ ആഭ്യന്തര പ്രശ്നങ്ങൾ കാരണം തിരഞ്ഞെടുപ്പ് പ്രവർത്തനം സജീവമായിരുന്നില്ല. ഇതിനെ മനസിലാക്കി വിജയത്തിന് ആവശ്യമായ പ്രവർത്തനങ്ങൾ മണ്ഡലത്തിന്റെ ചുമതല ഉണ്ടായിരുന്ന സിപിഎം നേതാക്കളുടെ ഭാഗത്തു നിന്ന് ഉണ്ടായില്ലെന്നും റിപ്പോർട്ട്‌ പറയുന്നുവെന്നാണ് സൂചനകൾ. ജയിക്കാൻ ആവശ്യമായ വോട്ട് കിട്ടില്ലെന്ന്‌ തിരിച്ചറിയാനോ ആവശ്യമായ പ്രവർത്തനങ്ങൾ ഏകോപിപ്പിക്കാനോ നേതാക്കൾക്കായില്ലെന്നും റിപ്പോർട്ടിൽ പറയുന്നതായി സൂചനയുണ്ട്. സി. ആർ. മഹേഷിനെ കഴിഞ്ഞ അഞ്ച് വർഷവും തദ്ദേശ സ്ഥാപനങ്ങളുടെ പരിപാടികളിൽ പങ്കെടുപ്പിച്ചു. സിപിഐയിൽ തിരഞ്ഞെടുപ്പ് ചുമതല ഉണ്ടായിരുന്ന നേതാവ് പ്രവർത്തനങ്ങളിൽ സജീവമായില്ല. സ്ഥാനാർഥി മോഹികളും സിപിഐയിൽ ഏറെ ഉണ്ടായിരുന്നു.
ജയിക്കാൻ ആവശ്യമായ ഇടപെടൽ സിപിഎം, സിപിഐ നേതാക്കളുടെ ഭാഗത്തു നിന്നുണ്ടായില്ലെന്നും റിപോർട്ടിൽ പ്രതിപാദിച്ചതായാണ് പുറത്ത് വരുന്ന സൂചനകൾ. കുണ്ടറയിൽ സിപിഎം നേതാക്കൾക്കിടയിലും സിപിഎമ്മും സിപിഐയും തമ്മിലും ഏകോപനം ഉണ്ടായില്ല. പാർട്ടിക്കും മുന്നണിക്കും മേൽകൈ ഉണ്ടായിരുന്ന കരുനാഗപ്പള്ളിയിൽ കനത്ത തോൽവി പ്രതീക്ഷിച്ചിരുന്നില്ല. കുണ്ടറയിൽ വിജയം ഉറപ്പിക്കാൻ ആവശ്യമായ പ്രവർത്തനങ്ങൾ ഉണ്ടായില്ല. മന്ത്രി എന്ന നിലയിൽ ജെ. മേഴ്സികുട്ടി അമ്മയുടെ പ്രവർത്തനങ്ങളോട് വിരുദ്ധ അഭിപ്രായം മണ്ഡലത്തിൽ ഉണ്ടായിരുന്നുവെന്നും റിപ്പോർട്ടുകളുണ്ട്. എങ്കിലും ഇതിനെ മറികടക്കാനുള്ള സാധ്യത തേടിയില്ല. സിപിഎമ്മിന്റെ കുണ്ടറയിലെ തിരഞ്ഞെടുപ്പ് ചുമതല ഉണ്ടായിരുന്ന നേതാക്കൾ തമ്മിൽ ഏകോപനം ഉണ്ടായില്ല.
സിപിഐയുമായി അഭിപ്രായ വ്യത്യാസങ്ങൾ പരസ്യമായി പ്രകടിപ്പിക്കുന്ന സ്ഥിതിയും ഉണ്ടായെന്നു റിപ്പോർട്ട്‌ പറയുന്നതായാണ് സൂചന. ജില്ലയുടെ ചുമതല ഉണ്ടായിരുന്ന പോളിറ്റ് ബ്യൂറോ അംഗം എം. എ. ബേബി, സംസ്ഥാന സെക്രട്ടറിയേറ്റ് അംഗം ആനത്തലവട്ടം ആനന്ദൻ എന്നിവർ വീഴ്ചകൾ മുൻകൂട്ടി ചൂണ്ടി കാണിച്ചിട്ടും തിരുത്തലുകൾ ഉണ്ടായില്ലെന്നും റിപ്പോർട്ട്‌ കുറ്റപ്പെടുത്തുന്നു. തോൽക്കുമെന്ന് പാർട്ടി കണക്ക് കൂട്ടിയ കുന്നത്തൂരിലും കൊല്ലത്തും ചവറയിലും ജയിച്ചപ്പോൾ ജയിക്കുമെന്ന് ഉറപ്പാക്കിയിരുന്ന കരുനാഗപ്പള്ളിയിലും കുണ്ടറയിലും തോറ്റത് ഗുരുതര സാഹചര്യം ആണെന്നും റിപ്പോർട്ടിൽ പരാമർശമുണ്ട്.
Find out more:
click and follow Indiaherald WhatsApp channel