സിംഹങ്ങൾക്ക് രൗദ്രഭാവം; അശോക സ്തംഭത്തെ ചൊല്ലി വിവാദം! ഭരണഘടനാ വിരുദ്ധമായി പ്രധാനമന്ത്രി അശോക സ്തംഭത്തെ അനാച്ഛാദനം ചെയ്തു എന്നതുകൂടാതെ സിംഹങ്ങളുടെ രൂപം ക്രൗര്യം നിറഞ്ഞതാണെന്നും പ്രതിപക്ഷ പാ‍ർട്ടികൾ വിമർശനം ഉന്നയിക്കുന്നു. പുതിയ പാർലമെന്റ് മന്ദിരത്തിനു മുകളിൽ സ്ഥാപിക്കുന്നതിനായി കഴിഞ്ഞ ദിവസം പ്രധാനമന്ത്രി നരേന്ദ്ര മോദി അനാച്ഛാദനം ചെയ്ത വെങ്കലത്തിൽ തീർത്ത അശോക സ്തംഭത്തെ ചൊല്ലി വിവാദം. യഥാർത്ഥ അശോക സ്തംഭത്തിലെ സിംഹങ്ങളുടെ മുഖത്ത് സൗമ്യ ഭാവമാണെന്നും പ്രധാനമന്ത്രി അനാച്ഛാദനം ചെയ്ത അശോക സ്തംഭത്തിലെ സിംഹങ്ങളുടെ മുഖത്ത് ക്രൗര്യ ഭാവമാണെന്നും നരഭോജികളെപ്പോലെയാണിരിക്കുന്നതെന്നും ലാലു പ്രസാദ് യാദവിന്റെ രാഷ്ട്രീയ ജനതാ ദൾ (ആ‍ർജെഡി) വിമർശനം ഉന്നയിച്ചു.
അശോകസ്തംഭത്തിലെ സിംഹങ്ങളുടെ രൂപ ഭാവമാറ്റം ദേശീയ ചിഹ്നത്തോടുള്ള അനാദരവാണെന്ന് പ്രതിപക്ഷ പാർട്ടികളും നേതാക്കളും കുറ്റപ്പെടുത്തുന്നു. "ഇന്ത്യയുടെ ദേശീയ ചിഹ്നത്തിന് അപമാനമാണ്. യഥാർത്ഥ അശോക സ്തംഭത്തിലെ ഇടതു വശത്തുള്ള സിംഹം ഭംഗിയുള്ളതും ആത്മവിശ്വാസമുള്ളതുമാണ്. പാർലമെന്റിനു മുകളിൽ വെക്കാനുള്ള മോദീ വേർഷന്റെ വലതുവശത്തുള്ളതിന് ക്രൗര്യഭാവവും ശരിയായ അനുപാതമില്ലാത്തതുമാണ്. നാണക്കേട്, അത് ഉടൻ മാറ്റൂ." തൃണമൂൽ കോൺഗ്രസ് രാജ്യസഭാംഗം ജവഹർ സിർകാർ ട്വീറ്റ് ചെയ്തു. രണ്ട് വ്യത്യസ്ത ചിത്രങ്ങൾ പങ്കുവെച്ചുകൊണ്ടാണ് അദ്ദേഹം വിമർശനം ഉന്നയിച്ചിരിക്കുന്നത്. മെഹുവ മൊയ്ത്രയും കേന്ദ്രത്തിനെതിരെ വിമർശനവുമായി രംഗത്തെത്തിയിട്ടുണ്ട്.
ചരിത്രകാരൻ എസ് ഇർഫാൻ ഹബീബും കേന്ദ്രത്തിനെതിരെ വിമർശനം ഉന്നയിച്ചു. "ദേശീയ ചിഹ്നത്തിൽ ഇടപെടുന്നത് അനാവശ്യവും ഒഴിവാക്കാവുന്നതുമായിരുന്നു. എന്തുകൊണ്ടാണ് നമ്മുടെ സിംഹങ്ങൾ ക്രൗര്യം നിറഞ്ഞതായി കാണപ്പെടുന്നത്." അദ്ദേഹം കുറ്റപ്പെടുത്തി. പുതിയ പാർലമെന്റ് മന്ദിരത്തിലെ ദേശീയ ചിഹ്‌നം പ്രധാനമന്ത്രി അനാഛാദനം ചെയ്തത് ഭരണഘടനാ വിരുദ്ധമാണെന്ന് സിപിഎം ചൂണ്ടിക്കാട്ടി. "ജനാധിപത്യത്തിന്റെ മൂന്ന്‌ വിഭാഗങ്ങളായ എക്‌സിക്യൂട്ടീവിനെയും ലെജിസ്ലേച്ചറിനെയും ജുഡീഷ്യറിയെയും ഭരണഘടന സംശയരഹിതമായി വേർതിരിച്ചിട്ടുണ്ട്‌. രാഷ്ട്രപതിയാണ്‌ പാർലമെന്റ് വിളിച്ചുചേർക്കുന്നത്‌. എക്‌സിക്യൂട്ടീവിന്റെ തലവനാണ്‌ പ്രധാനമന്ത്രി. നിയമങ്ങൾ നിർമ്മിക്കുക, എക്‌സിക്യൂട്ടീവിനെ പരിശോധനാവിധേയമാക്കുക തുടങ്ങി ലെജിസ്ലേച്ചറിന്‌ പ്രവർത്തിക്കാൻ അതിന്റേതായ സ്വതന്ത്ര രീതിയുണ്ട്‌."
"ഈ മൂന്ന്‌ വിഭാഗങ്ങൾക്ക്‌ ഭരണഘടന വേർതിരിച്ചു നൽകിയ അധികാരങ്ങളെ ഇകഴ്‌ത്തുകയാണ്‌ എക്‌സിക്യൂട്ടീവിന്റെ തലവനായ പ്രധാനമന്ത്രി ചെയ്തത്. മാത്രമല്ല ചടങ്ങിൽ പ്രധാനമന്ത്രി പൂജ നടത്തുകയും ചെയ്തു. എല്ലാ ഇന്ത്യാക്കാർക്കും അവരുടെ വിശ്വാസം ആചരിക്കാനും പിന്തുടരാനും ഭരണഘടന അവകാശവും സംരക്ഷണവും നൽകിയിട്ടുണ്ട്‌. ഇത്‌ ഒഴിവാക്കാനാവാത്ത അവകാശമാണ്‌. അതേ സമയം ഭരണകൂടം ഏതെങ്കിലും വിശ്വാസത്തെയോ മതത്തെയോ പിന്തുടരുകയോ ആചരിക്കുകയോ ചെയ്യുന്നില്ലെന്ന്‌ ഭരണഘടന അസനിഗ്‌ധമായി വ്യക്തമാക്കിയിട്ടുണ്ട്‌. ഭരണഘടനയെ സംരക്ഷിക്കുമെന്നും ഉയർത്തിപിടിക്കുമെന്നും അധികാരമേൽക്കുമ്പോൾ എടുത്ത സത്യപ്രതിജ്ഞ കർക്കശമായി പാലിക്കാൻ പ്രധാനമന്ത്രിയും കേന്ദ്രസർക്കാരും തയ്യാറാകണം." സിപിഎം പ്രസ്താവനയിൽ പറഞ്ഞു. പുതിയ പാർലമെന്റ് മന്ദിരത്തിനു മുകളിൽ സ്ഥാപിക്കുന്നതിനായി നിർമ്മിച്ച അശോക സ്തംഭം തിങ്കളാഴ്ചയാണ് പ്രധാനമന്ത്രി അനാച്ഛാദനം ചെയ്തത്. 6.5 മീറ്റർ ഉയരവും 9500 കിലോ ഭാരവുമാണ് ഇതിനുള്ളത്.
Find out more:
click and follow Indiaherald WhatsApp channel