ഭക്ഷണവുമില്ല വെള്ളവുമില്ല, മഠത്തിന് മുന്നിൽ സത്യാഗ്രഹവുമായി സിസ്റ്റർ ലൂസി കളപ്പുര! മഠം അധികൃതർ മനുഷ്യത്വരഹിതമായി പെരുമാറുന്നുവെന്ന് ചൂണ്ടിക്കാട്ടി സിസ്റ്റർ ലൂസി കളപ്പുര സത്യാഗ്രഹം ആരംഭിച്ചു. ഇന്ന് രാവിലെ പത്ത് മണി മുതൽ വയനാട്ടിലെ കാരയ്ക്കാമല മഠത്തിന് മുന്നിലായിരുന്നു സത്യാഗ്രഹം. നിലവിലെ കേസ് കഴിയുന്നതുവരെ മഠത്തിലെ എല്ലാ സൗകര്യങ്ങളും ഉപയോഗിക്കാനുള്ള അവകാശം തനിക്കുണ്ടെന്ന് ലൂസി പറഞ്ഞു. കോടതി വിധി മാനിക്കാതെയുള്ള പ്രവർത്തനമാണ് അധികൃതരുടെ ഭാഗത്ത് നിന്നുമുണ്ടാകുന്നത്.മഠം അധികൃതർ മനുഷ്യത്വരഹിതമായി പെരുമാറുകയും നിരന്തരമായി ഉപദ്രവിക്കുകയും ചെയ്യുന്നുവെന്ന് ആരോപിച്ചാണ് ലൂസി കളപ്പുര സത്യാഗ്രഹം ആരംഭിച്ചത്. മഠത്തിലെ സൗകര്യങ്ങൾ നിഷേധിക്കുന്നതിനൊപ്പം മാനസിക പീഡനം രൂക്ഷമാണെന്നും മഠം അധികൃതരോ മറ്റ് കന്യാസ്ത്രീകളോ തന്നോട്ട് സംസാരിക്കാറില്ലെന്നും അവർ വ്യക്തമാക്കി.
ഭക്ഷണം നിഷേധിക്കുന്നതിനൊപ്പം പ്രാർഥനാ മുറി, തേപ്പുപെട്ടി, ഫ്രിഡ്ജ് എന്നിവ ഉപയോഗിക്കുന്നതിലും വിലക്ക് തുടരുകയാണ്. ഇക്കാര്യം പല പ്രാവശ്യം താൻ പറഞ്ഞിരുന്നു. പുതിയ നിർമ്മാണങ്ങൾ നടത്തിയും വാതിലുകൾ സ്ഥാപിച്ചും മറ്റുള്ളവരിൽ നിന്നും തന്നെ ഒറ്റപ്പെടുത്തുകയാണ്.ഭക്ഷണം പാകം ചെയ്യാനുള്ള അടുക്കള തുറന്ന് നൽകുന്നില്ല. മുറിയുടെ വാതിൽ തകർക്കാനും വൈദ്യുതി വിച്ഛേദിക്കാനും ശ്രമം നടക്കുന്നുണ്ട്. തന്നെ നിരീക്ഷിക്കാൻ മഠത്തിൽ സിസിടിവി ക്യാമറകൾ സ്ഥാപിച്ചിരിക്കുകയാണ്. കോടതി വിധിയുടെ ലംഘനമാണ് മഠത്തിൽ നിന്നും നേരിടുന്നത്.
സഭയിൽ നിന്നും പുറത്താക്കിയതിനെതിരെ നൽകിയ നൽകിയ ഹർജിയിൽ അന്തിമ വിധി വരുന്നതുവരെ മഠത്തിൽ തുടരാമെന്ന് മാനന്തവാടി മുൻസിഫ് കോടതി ഉത്തരവുണ്ട്. ഈ ഉത്തരവ് പാലിക്കാതെയാണ് മഠം അധികൃതർ പെരുമാറുന്നത്.സത്യാഗ്രഹ സമരത്തിലേക്ക് അധികൃതരും സഭയും തന്നെ തള്ളിവിടുകയായിരുന്നു. നാല് വർഷമായി മറ്റ് സിസ്റ്റർമാർ തന്നോട് സംസാരിക്കാറില്ല. ഒരു അഭയാർഥിയെ പോലെ താൻ മുറിയിൽ മാത്രം കഴിഞ്ഞാൽ മതിയെന്ന നിലപാടിലാണ് അധികൃതർ.
എൻ്റെ അവകാശങ്ങളെല്ലാം മഠം അധികൃതർ നിഷേധിച്ചിരിക്കുകയാണെന്നും ലൂസി പറഞ്ഞു.നിസഹായമായ അവസ്ഥയിലാണ് താനിപ്പോഴുള്ളത്. തൻ്റെ കിടപ്പ് മുറിക്കും കുളിമുറിക്കും സമീപവും സിസിടിവി സ്ഥാപിച്ചിരിക്കുകയാണ്. സമീപകാലത്താണ് ഒരു ക്യാമറ കൂടി ഘടിപ്പിച്ചത്. ക്യാമറ സ്ഥാപിച്ചതിൻ്റെ ഉദ്ദേശം എന്താണെന്നറിയില്ല. അരക്ഷിതാവസ്ഥയാണ് മഠത്തിൽ നിന്നും നേരിടേണ്ടി വരുന്നതെന്നും ലൂസി പറഞ്ഞു.
Find out more:
click and follow Indiaherald WhatsApp channel