മഹാരാഷ്ട്ര പോളിങ് ബൂത്തിലേക്ക്; 288 സീറ്റുകളിൽ മത്സരിക്കുന്നത് 4,136 സ്ഥാനാർഥികൾ! ശിവസേന, എൻസിപി കക്ഷികളുടെ പിളർപ്പിന് ശേഷം നടക്കുന്ന ആദ്യ നിയമസഭാ തെരഞ്ഞെടുപ്പാണിത്. 2,086 സ്വതന്ത്രരുൾപ്പെടെ 4,136 സ്ഥാനാർഥികളാണ് മത്സരരംഗത്തുള്ളത്. 9.7 കോടി വോട്ടർമാരാണ് സമ്മതിദാനം വിനിയോഗിക്കുക. ഇതിൽ അഞ്ച് കോടി പുരുഷന്മാരും 4.69 കോടി സ്ത്രീകളും ഉൾപ്പെടുന്നു. ഒരു ലക്ഷത്തിലധികം പോളിങ് ബൂത്തുകളാണ് ക്രമീകരിച്ചിരിക്കുന്നത്. രാവിലെ ഏഴ് മണിക്ക് വോട്ടെടുപ്പ് ആരംഭിച്ചു. മഹാരാഷ്ട്രയിലെ 288 നിയമസഭാ മണ്ഡലങ്ങൾ ഇന്ന് പോളിങ് ബൂത്തിലേക്ക്. ബിജെപി നേതൃത്വം നൽകുന്ന ഭരണകക്ഷിയായ മഹായുതി സഖ്യവും കോൺഗ്രസ് നേതൃത്വം നൽകുന്ന പ്രതിപക്ഷമായ മഹാ വികാസ് അഘാഡിയും തമ്മിലാണ് പോരാട്ടം.
മുഖ്യമന്ത്രി ഏക്നാഥ് ഷിൻഡെ, ഉപമുഖ്യമന്ത്രിമാരായ ദേവേന്ദ്ര ഫഡ്നാവിസ്, അജിത് പവാർ, ശിവസേന (ഉദ്ധവ് താക്കറെ) നേതാവ് ആദിത്യ താക്കറെ, ശിവസേന (ഏക്നാഥ് ഷിൻഡെ) മിലിന്ദ് ദിയോറ, കോൺഗ്രസ് നേതാവ് നാന പട്ടോളെ തുടങ്ങിയവരാണ് മത്സരരംഗത്തുള്ള പ്രമുഖർ. കൊപ്രി പച്പഖാഡിയിൽ നിന്നാണ് ഏക്നാഥ് ഷിൻഡെയുടെ മത്സരം. ബാരാമതിയിൽനിന്ന് അജിത് പവാറും നാഗ്പുർ സൗത്ത് വെസ്റ്റിൽനിന്ന് ദേവേന്ദ്ര ഫഡ്നാവിസും മത്സരിക്കുന്നു. സകോലിയിൽ നിന്നാണ് നാനാ പട്ടോളെ ജനവിധി തേടുന്നത്. വോ‍ർലിയിൽ ആദിത്യ താക്കറെയും മിലിന്ദ് ദിയോറയും തമ്മിലാണ് പോരാട്ടം. കൊല്ലപ്പെട്ട എൻസിപി (അജിത് പവാർ) നേതാവും മുൻ മന്ത്രിയുമായ ബാബാ സിദ്ദിഖിയുടെ മകൻ സീഷൻ സിദ്ദിഖി ബാന്ദ്ര ഈസ്റ്റിൽ നിന്നാണ് മത്സരിക്കുന്നത്.അതേസമയം ഇക്കഴിഞ്ഞ ലോക്സഭാ തെരഞ്ഞെടുപ്പിൽ നടത്തിയ മുന്നേറ്റം നൽകുന്ന ആത്മവിശ്വാസത്തോടെയാണ് മഹാവികാസ് അഘാഡി തെരഞ്ഞെടുപ്പിനെ നേരിടുന്നത്.
48 ലോക്സഭാ സീറ്റുകളിൽ 31 ഉം മഹാവികാസ് അഘാഡി പിടിച്ചെടുത്തത് മഹായുതി സഖ്യത്തെ ഞെട്ടിച്ചിരുന്നു. 17 സീറ്റുകളിൽ മാത്രമാണ് മഹായുതി സഖ്യത്തിന് വിജയിക്കാനായത്. 23നാണ് വോട്ടെണ്ണൽ.വീറും വാശിയ നിറഞ്ഞ തെരഞ്ഞെടുപ്പ് പ്രചാരണത്തിൽ ബിജെപിക്കായി പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ തുടങ്ങിയ നേതാക്കളും കോൺഗ്രസിനായി എഐസിസി അധ്യക്ഷൻ മല്ലികാർജുൻ ഖാർഗെ, കോൺഗ്രസ് നേതാക്കളായ രാഹുൽ ഗാന്ധി, പ്രിയങ്ക ഗാന്ധി തുടങ്ങിയവർ അണിനിരന്നു. ഹരിയാനയിലെ മിന്നും വിജയത്തിന് പിന്നാലെ നടക്കുന്ന മഹാരാഷ്ട്ര നിയമസഭാ തെരഞ്ഞെടുപ്പിൽ ഭരണം നിലനിർത്താമെന്ന ആത്മവിശ്വാസമാണ് മഹായുതി സഖ്യത്തിനുള്ളത്.
മഹായുതി സഖ്യത്തിൽ, ബിജെപി 149 സീറ്റുകളിലും മുഖ്യമന്ത്രി ഏക്നാഥ് ഷിൻഡെ നേതൃത്വം നൽകുന്ന ശിവസേന 81 സീറ്റുകളിലും ഉപമുഖ്യമന്ത്രി അജിത് പവാർ നേതൃത്വം എൻസിപി 59 സീറ്റുകളിലുമാണ് മത്സരിക്കുന്നത്. മഹാ വികാസ് അഘാഡിയിൽ കോൺഗ്രസ് 101 സീറ്റുകളിലാണ് മത്സരരംഗത്തുള്ളത്. ഉദ്ധവ് താക്കറെ നേതൃത്വം നൽകുന്ന ശിവസേന 95 സീറ്റുകളിലും ശരദ് പവാർ നേതൃത്വം നൽകുന്ന എൻസിപി 86 സീറ്റുകളിലും മത്സരിക്കുന്നു. ബിഎസ്പി 237 ഇടത്തും എഐഎംഐഎം 17 ഇടത്തും സ്ഥാനാർഥികളെ നിർത്തിയിട്ടുണ്ട്.
Find out more:
click and follow Indiaherald WhatsApp channel