ഷിൻഡെയ്ക്ക് നഗരവികസനം,ധനകാര്യം നിലനിർത്തി അജിത് പവാർ! ഏക്നാഥ് ഷിൻഡെ ആവശ്യപ്പെട്ടിരുന്നെങ്കിലും മുഖ്യമന്ത്രി ദേവേന്ദ്ര ഫഡ്നാവിസ് ആഭ്യന്തര വകുപ്പ് നിലനിർത്തി. ഉപമുഖ്യമന്ത്രി ഏക്നാഥ് ഷിൻഡെ നഗരവികസനം, ഹൗസിങ്, പൊതുമരാമത്ത് എന്നീ വകുപ്പുകളിൽ തുടരും. ഇതോടെ മന്ത്രിസഭയിലെ രണ്ടാമൻ ഷിൻഡെയെന്ന് വ്യക്തം. ഉപമുഖ്യമന്ത്രിയായ അജിത് പവാർ ധനകാര്യം, ആസൂത്രണം, എക്സൈസ് വകുപ്പുകൾ നിലനിർത്തി.മഹാരാഷ്ട്രയിൽ കല്ലുകടിയായി തുടർന്ന മന്ത്രിസഭാ വകുപ്പ് വിഭജനം പൂർത്തിയായി. നിയമസഭാ തെരഞ്ഞെടുപ്പ് ഫലം വന്ന് ഏതാണ്ട് ഒരു മാസത്തിന് ശേഷമാണ് ദേവേന്ദ്ര ഫഡ്നാവിസ് സർക്കാർ വകുപ്പ് വിഭജനം പൂർത്തിയാക്കിയത്. എൻസിപിയുടെ ധനജ്ഞയ മുണ്ടെയ്ക്ക് ഭക്ഷ്യ, സിവിൽ സപ്ലൈസ്, ഉപഭോക്തൃ സംരക്ഷണ വകുപ്പുകൾ ലഭിച്ചു.
ഹസൻ മുഷ്രിഫിന് മെഡിക്കൽ വിദ്യാഭ്യാസം, ദത്താത്രേയ ഭർണേയ്ക്ക് കായികം, യുവജനക്ഷേമം, ന്യൂനപക്ഷ വികസനം, അതിഥി താത്കറെയ്ക്ക് വനിതാ, ശിശുക്ഷേമം, നർഹരി സിർവാളിന് ഫുഡ്, ഡ്രഡ് അഡ്മിനിസ്ട്രേഷൻ, സ്പെഷ്യൽ അസിസ്റ്റൻസ് വകുപ്പുകളും ലഭിച്ചു. 288 അംഗ മഹാരാഷ്ട്ര നിയമസഭയിലേക്ക് നടന്ന തെരഞ്ഞെടുപ്പിൽ ബിജെപി - ശിവസേന (ഏക്നാഥ് ഷിൻഡെ) - എൻസിപി (അജിത് പവാർ) എന്നീ കക്ഷികളുടെ മഹായുതി സഖ്യം വൻ മുന്നേറ്റമായിരുന്നു നടത്തിയത്. ബിജെപി ഒറ്റയ്ക്ക് 132 പിടിച്ചെടുത്തപ്പോൾ ശിവസേന, എൻസിപി കക്ഷികൾ യഥാക്രമം 57, 41 സീറ്റുകളിൽ വിജയിച്ചു. കോൺഗ്രസ് - ശിവസേന (ഉദ്ധവ് താക്കറെ) - എൻസിപി (ശരദ് പവാർ) കക്ഷികളുടെ മഹാ വികാസ് അഘാഡി സഖ്യത്തിന് കനത്ത തിരിച്ചടിയായി തെരഞ്ഞെടുപ്പ് ഫലം.
ശിവസേന 20 സീറ്റുകളിൽ വിജയിച്ചപ്പോൾ കോൺഗ്രസും എൻസിപിയും യഥാക്രമം 16, 10 സീറ്റുകളിൽ ഒതുങ്ങി. സമാജ്‍വാദി പാർട്ടി രണ്ടിടത്തും സ്വതന്ത്രരും മറ്റുള്ളവരും 10 സീറ്റുകളിലും വിജയിച്ചു. ശിവസേനയുടെ ശംഭുരാജ് ദേശായി ആണ് ടൂറിസം മന്ത്രി. ഖനനം, എക്സ് സർവീസ്മെൻ്റ് ക്ഷേമം എന്നീ വകുപ്പുകളും ശംഭുരാജ് ദേശായിക്ക് ലഭിച്ചു. പ്രതാപ് സർനായിക്കിനാണ് ഗതാഗതം. ഉദയ് സമാന്ത് ആണ് വ്യവസായം, മറാത്തി ഭാഷാ മന്ത്രി. ദാദ ഭൂസെയ്ക്ക് സ്കൂൾ വിദ്യാഭ്യാസ വകുപ്പും ലഭിച്ചു.ബിജെപിയുടെ ചന്ദ്രശേഖർ ഭവൻകുലെ ആണ് റവന്യൂ മന്ത്രി. രാധാകൃഷ്ണ വിഖേ പാട്ടീൽ, ഗിരീഷ് മഹാജൻ എന്നിവരാണ് രണ്ടായി വിഭജിച്ച ജലസേചന വകുപ്പിലെ ഗോദാവരി ആൻ്റ് കൃഷ്ണവാലി ഡെവലപ്മെൻ്റ് കോർപറേഷൻ, വിദർഭ തപി ആൻ്റ് കൊങ്കൺ ഡെവലപ്മെൻ്റ് കോർപറേഷൻ മന്ത്രിമാർ.
ചന്ദ്രകാന്ത് പാട്ടീലിന് ഉന്നത, ടെക്നിക്കൽ വിദ്യാഭ്യാസം, പാർലമെൻ്ററികാര്യം വകുപ്പുകൾ ലഭിച്ചു. ഗണേഷ് നായിക് ആണ് വനം വകുപ്പ് മന്ത്രി. ഒബിസി, ക്ഷീരവികസന വകുപ്പുകൾ അതുൽ സാവെയ്ക്ക് ലഭിച്ചു. പങ്കജ മുണ്ടെയാണ് പരിസ്ഥിതി, കാലാവസ്ഥ, മൃഗസംരക്ഷണ വകുപ്പ് മന്ത്രി.നഗരമേഖലയിലെ തദ്ദേശ സ്ഥാപനങ്ങളുടെയും പ്രധാന ഏജൻസികളായ എംഎംആർഡിഎ, സിഡ്കോ, എഎസ്ആർഡിസി എന്നിവയുടെയും നിയന്ത്രണം ഏക്നാഥ് ഷിൻഡെയ്ക്ക് ലഭിച്ചു. ആഭ്യന്തരം ലഭിച്ചില്ലെങ്കിൽ ഇവയിൽ ഷിൻഡെ ഉറച്ചുനിന്നിരുന്നതായി ശിവസേനാ വൃത്തങ്ങളെ ഉദ്ധരിച്ചുള്ള റിപ്പോ‍ർട്ടുണ്ടായിരുന്നു.
Find out more:
click and follow Indiaherald WhatsApp channel