ഷെയ്ഖ് ഹസീനയെ മടക്കി അയയ്ക്കണമെന്ന് സന്ദേശമയച്ച് ബംഗ്ലാദേശ്! ഇന്ത്യയ്ക്ക് നയതന്ത്ര സന്ദേശമയച്ചെന്നും ജുഡീഷ്യൽ നടപടിക്രമങ്ങൾക്കായി ബംഗ്ലാദേശിന് ഷെയ്ഖ് ഹസീനയെ ആവശ്യമുണ്ടെന്നും ബംഗ്ലാദേശ് വിദേശകാര്യ ഉപദേഷ്ടാവ് തൗഹിദ് ഹുസൈൻ ബംഗ്ലാദേശ് ദിനപത്രമായ ദ ഡെയ്‍ലി സ്റ്റാറിനോട് പറഞ്ഞു. ഇന്ത്യയുമായുള്ള തടവുപുള്ളി കൈമാറ്റ കരാ‍ർ പ്രകാരം ഷെയ്ഖ് ഹസീനയെ തിരിച്ചെത്തിക്കുമെന്ന് ബംഗ്ലാദേശ് ആഭ്യന്തരകാര്യ ഉപദേഷ്ടാവ് ലഫ്. ജനറൽ ജഹാംഗീ‍ർ അലാം ചൗധരി ബംഗ്ലാദേശ് ദിനപത്രമായ ധാക്ക ട്രിബ്യൂണിനോടും പറഞ്ഞു. ഇന്ത്യയിൽ അഭയം തേടിയ ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീനയെ മടക്കി അയയ്ക്കണമെന്ന ആവശ്യം ഉന്നയിച്ച് ഇന്ത്യയ്ക്ക് നയതന്ത്ര സന്ദേശമയച്ച് ബംഗ്ലാദേശ്. വിദേശകാര്യ സെക്രട്ടറി വിക്രം മിസ്രി ബംഗ്ലാദേശ് സന്ദ‍ർശിച്ച് ഇടക്കാല സർക്കാരിന്റെ മുഖ്യ ഉപദേഷ്ടാവുമായി കൂടിക്കാഴ്ച നടത്തി ആഴ്ചകൾക്ക് പിന്നാലെയാണ് ഷെയ്ഖ് ഹസീനയെ കൈമാറണമെന്ന ആവശ്യവുമായി നയതന്ത്ര സന്ദേശം എത്തുന്നത്.
വിക്രം മിസ്രിയുമായുള്ള കൂടിക്കാഴ്ചയിൽ ഷെയ്ഖ് ഹസീന ഇന്ത്യയിൽ തുടരുന്ന കാര്യം ചർച്ചയായെന്ന് മുഖ്യ ഉപദേഷ്ടാവിൻ്റെ ഓഫീസ് അറിയിച്ചിരുന്നു. ഷെയ്ഖ് ഹസീന ഇന്ത്യയിലിരുന്ന് നടത്തുന്ന പ്രസ്താവനകളിൽ ജനം ആശങ്കാകുലരാണെന്നും സംഘർഷം സൃഷ്ടിക്കുന്നതായും മുഖ്യ ഉപദേഷ്ടാവ് പിന്നീട് പറഞ്ഞിരുന്നു. ഇന്ത്യൻ വിദേശകാര്യ സെക്രട്ടറിയുടെ ബംഗ്ലാദേശ് സന്ദർശനത്തിന് മുന്നോടിയായി മുഹമ്മദ് യൂനുസ് നേതൃത്വം നൽകുന്ന ഇടക്കാല സർക്കാരിനെതിരെ ഷെയ്ഖ് ഹസീന രംഗത്തെത്തിയിരുന്നു. ഷെയ്ഖ് ഹസീനയെ കൈമാറമെന്ന് ഇന്ത്യയോട് ആവശ്യപ്പെടുമെന്ന് ബംഗ്ലാദേശിലെ ഇടക്കാല സ‍ർക്കാരിന് നേതൃത്വം നൽകുന്ന മുഹമ്മദ് യൂനുസ് വ്യക്തമാക്കിയിരുന്നു. മുൻ സർക്കാരിനെതിരായ വിദ്യാ‍ർഥി പ്രക്ഷോഭത്തിൽ നിരവധി പേർ മരണപ്പെട്ട സംഭവത്തിൽ ഷെയ്ഖ് ഹസീന ഉൾപ്പെടെ ഉളളവരെ നിയമനടപടികൾക്ക് വിധേയമാക്കുമെന്നായിരുന്നു മുഹമ്മദ് യൂനുസിന്റെ പ്രഖ്യാപനം.
ഷെയ്ഖ് ഹസീനയ്ക്കെതിരെ അറസ്റ്റ് വാറണ്ട് പുറപ്പെടുവിക്കണമെന്ന ആവശ്യവുമായി പുതിയതായി നിയമിതനായ ചീഫ് പ്രോസിക്യൂട്ടർ മുഹമ്മദ് താജുൽ ഇസ്ലാം ബംഗ്ലാദേശ് ഇൻ്റർനാഷണൽ ക്രൈംസ് ട്രിബ്യൂണലിനെ സമീപിച്ചിരുന്നു. 2009 മുതൽ ബംഗ്ലാദേശ് ഭരിക്കുന്ന ഷെയ്ഖ് ഹസീന സർക്കാരിനെതിരെ വൻ പ്രതിഷേധം പൊട്ടിപ്പുറപ്പെട്ടതിനെ തുടർന്ന് പ്രധാനമന്ത്രി സ്ഥാനം രാജിവെച്ച ഷെയ്ഖ് ഹസീന മണിക്കൂറുകൾക്കുള്ളിൽ ഇന്ത്യയിൽ അഭയം തേടുകയായിരുന്നു. ഓഗസ്റ്റ് അഞ്ചുമുതൽ ഇന്ത്യയിൽ തുടരുന്ന ഷെയ്ഖ് ഹസീനയെ വിചാരണയ്ക്ക് വധേയമാക്കാനാണ് ബംഗ്ലാദേശ് ഭരണകൂടത്തിൻ്റെ തീരുമാനം. 77കാരിയായ ഷെയ്ഖ് ഹസീന 42 കൊലക്കേസ് ഉൾപ്പെടെ 51 കേസുകൾ ബംഗ്ലാദേശിൽ നേരിടുന്നുണ്ട്.
Find out more:
click and follow Indiaherald WhatsApp channel