യുവ ഡോക്ടർ നേരിട്ടത് ക്രൂരബലാത്സംഗം; പ്രതി സഞ്ജയ് റോയിക്ക് എന്തുകൊണ്ട് വധശിക്ഷ വിധിച്ചില്ല! കൊൽക്കത്തയിലെ സിയാൽദ സിവിൽ ആൻ്റ് ക്രിമിനൽ കോടതിയിലെ സെഷൻസ് ജഡ്ജി അനിർബൻ ദാസിൻ്റേതാണ് നിരീക്ഷണം. ജീവപര്യന്തം തടവും (മരണം വരെ തടവ്) 50,000 രൂപ പിഴയുമാണ് പ്രതിക്ക് കോടതി ശിക്ഷ വിധിച്ചത്. 31കാരിയായ ഡോക്ടറെ ബലാത്സംഗം ചെയ്ത് കൊലപ്പെടുത്തിയ സംഭവം അപൂർവങ്ങളിൽ അപൂർവമായ കേസാണെന്നും പ്രതിക്ക് വധശിക്ഷ നൽകണമെന്നും കേസന്വേഷിച്ച സിബിഐ കോടതിയോട് ആവശ്യപ്പെട്ടിരുന്നു.രാജ്യമൊട്ടാകെ വൻ പ്രതിഷേധങ്ങൾക്ക് വഴിവെച്ച കൊൽക്കത്ത ആർജി കർ ആശുപത്രിയിലെ ട്രെയിനി ഡോക്ടറുടെ ബലാത്സംഗക്കൊലപാതകത്തിൽ പ്രതി സഞ്ജയ് റോയിയെ വധശിക്ഷയിൽനിന്ന് ഒഴിവാക്കിയത് അപൂർവങ്ങളിൽ അപൂർവമായ കേസല്ലെന്ന് നിരീക്ഷിച്ച്. ഭാരതീയ ന്യായ സംഹിതയിലെ സെക്ഷൻ 64 (ബലാത്സംഗം), 66 (ബലാത്സംഗ ഇരയുടെ മരണത്തിൽ കലാശിക്കുന്ന പരിക്ക്), 103 (1) (കൊലപാതകം) എന്നീ വകുപ്പുകൾ പ്രകാരം 33കാരനായ പ്രതി സഞ്ജയ് റോയ് കുറ്റക്കാരനാണെന്ന് ഇക്കഴിഞ്ഞ ശനിയാഴ്ച കോടതി കണ്ടെത്തിയിരുന്നു. പ്രതി സഞ്ജയ് റോയിക്കെതിരായ കുറ്റപത്രത്തിൽ 11 തെളിവുകളാണ് സിബിഐ ഉൾപ്പെടുത്തിയത്.
സംഭവസ്ഥലത്തും കൊല്ലപ്പെട്ട ഡോക്ടറുടെ ശരീരത്തിൽ നിന്നും ലഭിച്ച പ്രതിയുടെ ഡിഎൻഎ സാംപിളുകൾ നിർണായകമായി. 50 ഓളം സാക്ഷികളെ കോടതി വിസ്തരിച്ചു.2024 ഓഗസ്റ്റ് ഒൻപതിനാണ് പിജി ട്രെയിനി ഡോക്ടറായ 31കാരിയെ ആർജി കർ മെഡിക്കൽ കോളേജ് ആൻ്റ് ഹോസ്പിറ്റലിൻ്റെ സെമിനാർ ഹാളിൽ കൊല്ലപ്പെട്ട നിലയിൽ കണ്ടെത്തിയത്. കേസ് അന്വേഷണം ഏറ്റെടുത്ത പശ്ചിമ ബംഗാൾ സിഐഡി ഒരു ദിവസത്തിനകം പ്രതി സഞ്ജയ് റോയിയെ അറസ്റ്റ് ചെയ്തു. മുൻ പോലീസ് വളണ്ടിയറായിരുന്നു സഞ്ജയ് റോയ്. പിന്നീട് കൊൽക്കത്ത ഹൈക്കോടതി കേസ് സിബിഐക്ക് കൈമാറി. കേസിൽ തെളിവ് നശിപ്പിക്കാൻ ശ്രമിച്ചെന്ന കുറ്റം ചുമത്തി മെഡിക്കൽ കോളേജ് പ്രിൻസിപ്പാൾ സന്ദീപ് ഘോഷ്, പോലീസ് ഉദ്യോഗസ്ഥൻ അഭിജിത്ത് മൊണ്ഡൽ എന്നിവരെ സിബിഐ അറസ്റ്റ് ചെയ്തിരുന്നു. 90 ദിവസത്തിനകം ഇവർക്കെതിരെ കുറ്റപത്രം സമർപ്പിക്കാൻ സിബിഐക്ക് കഴിയാതെ വന്നതോടെ ഇരുവർക്കും സ്വാഭാവിക ജാമ്യം ലഭിച്ചു.
ശിക്ഷാവിധി പ്രസ്താവിക്കുന്നതിന് മുൻപ് നടന്ന വാദത്തിനിടെ, താൻ കുറ്റം ചെയ്തിട്ടില്ലെന്നും തന്നെ കുടുക്കിയതാണെന്നും പ്രതി സഞ്ജയ് റോയ് ആവർത്തിച്ചു. ജയിലിനുള്ളിൽ തന്നെ മർദിച്ച് പേപ്പറുകളിൽ ഒപ്പിടാൻ നിർബന്ധിച്ചുവെന്നും പ്രതി ആരോപിച്ചു.ശിക്ഷാവിധി പ്രസ്താവിച്ചതിന് പിന്നാലെ കോടതിക്ക് പുറത്ത് സിബിഐക്കെതിരെ മുദ്രാവാക്യം മുഴക്കി പ്രതിഷേധമുണ്ടായി. വിധിയിൽ അതൃപ്തി അറിയിച്ച സിവിൽ സൊസൈറ്റി അംഗങ്ങളും ഡോക്ടർമാരും പ്രതിഷേധം തുടരുമെന്ന് വ്യക്തമാക്കി. സിബിഐ അന്വേഷണത്തിൽ തൃപ്തിയില്ലെന്ന് കൊല്ലപ്പെട്ട ഡോക്ടറുടെ മാതാപിതാക്കൾ പറഞ്ഞു. തങ്ങൾക്ക് നഷ്ടപരിഹാരത്തുക ആവശ്യമില്ലെന്നും നീതിയാണ് വേണ്ടതെന്നും അവർ കോടതിമുറിക്കുള്ളിൽ ചൂണ്ടിക്കാട്ടി. അതേസമയം കേസ് കൊൽക്കത്ത പോലീസ് അന്വേഷിച്ചിരുന്നെങ്കിൽ പ്രതിക്ക് വധശിക്ഷ ഉറപ്പാക്കുമായിരുന്നുവെന്ന് പശ്ചിമ ബംഗാൾ മുഖ്യമന്ത്രി മമത ബാനർജി പറഞ്ഞു.
സെക്ഷൻ 103 (1) പ്രകാരം വധശിക്ഷയോ ജീവപര്യന്തമോ; സെക്ഷൻ 66 പ്രകാരം 20 വർഷത്തിൽ കുറയാത്ത തടവോ ജീവപര്യന്തമോ; സെക്ഷൻ 64 പ്രകാരം 10 വർഷത്തിൽ കുറയാത്ത തടവോ ജീവപര്യന്തമോ പ്രതിക്ക് ശിക്ഷ ലഭിക്കുമെന്ന് ജസ്റ്റിസ് അനിർബൻ ദാസ് വ്യക്തമാക്കിയിരുന്നു. എന്നാൽ ശിക്ഷാവിധി പ്രസ്താവിക്കവെ, കുറ്റകൃത്യം ക്രൂരമാണെങ്കിലും കേസ് അപൂർവങ്ങളിൽ അപൂർവമായതല്ലെന്നും അതിനാൽ മരണം വരെ തടവ് ശിക്ഷ നൽകുന്നുവെന്നും കോടതി ഉത്തരവിട്ടു. കൊല്ലപ്പെട്ട ഡോക്ടറുടെ കുടുംബത്തിന് പശ്ചിമ ബംഗാൾ സർക്കാർ 17 ലക്ഷം രൂപ നഷ്ടപരിഹാരം നൽകണമെന്നും കോടതി നിർദേശിച്ചു. ഫൊറൻസിക് തെളിവുകൾ അടിസ്ഥാനമാക്കിയാണ് കോടതി ശിക്ഷ വിധിച്ചത്.
Find out more:
click and follow Indiaherald WhatsApp channel