കേന്ദ്ര ബജറ്റ്; രാജ്യത്തെ ഇടത്തരക്കാർക്കായി വൻ പ്രഖ്യാപനങ്ങൾ! പെരുമാറ്റച്ചട്ടം നിലനിൽക്കുന്നതിനാൽ ബജറ്റിൽ ഡൽഹിക്കായി പ്രഖ്യാപനങ്ങളില്ലെങ്കിലും ഡൽഹിയിലെ വോട്ടർമാരിൽ വലിയൊരു വിഭാഗമായ രാജ്യത്തെ ഇടത്തരക്കാർക്കായി വൻ പ്രഖ്യാപനങ്ങൾ ഉൾപ്പെടുത്താനായത് നിയമസഭാ തെരഞ്ഞെടുപ്പിൽ ബിജെപിക്ക് ആത്മവിശ്വാസം വർധിപ്പിക്കുന്നതാണ്.ഡൽഹി നിയമസഭാ തെരഞ്ഞെടുപ്പിന് ദിവസങ്ങൾ മാത്രം ബാക്കിനിൽക്കെയാണ് ഇടത്തരക്കാർക്ക് നേട്ടമാകുന്ന വൻ പ്രഖ്യാപനങ്ങൾ ഉൾക്കൊള്ളിച്ച് സമ്പൂർണ കേന്ദ്ര ബജറ്റ് നരേന്ദ്ര മോദി സർക്കാരിന് അവതരിപ്പിക്കാൻ കഴിഞ്ഞത്.2015, 2020 നിയമസഭാ തെരഞ്ഞെടുപ്പുകളിലെ വോട്ട് കണക്കുകൾ പരിശോധിക്കുമ്പോൾ, ദരിദ്രർ, വരുമാനം കുറഞ്ഞവർ, ഇടത്തരം വരുമാനമുള്ളവർ എന്നീ വോട്ടർമാർക്കിടയിൽ എഎപിയും ബിജെപിയും തമ്മിലുള്ള വോട്ട് വ്യത്യാസം കുറഞ്ഞുവരുന്നതായി ലോക്നിഥി സിഎസ്ഡിഎസിൻ്റെ റിപ്പോർട്ടിൽ വ്യക്തമാക്കുന്നുണ്ട്.
2020ലെ തെരഞ്ഞെടുപ്പിൽ വോട്ട് ശതമാനത്തിൽ ബിജെപിയേക്കാൾ 15 ശതമാനത്തിലധികം വോട്ട് എഎപിക്ക് നേടാനായിട്ടുണ്ടെങ്കിലും ഇടത്തരം വോട്ടർമാർക്കിടയിൽ ഇരു പാർട്ടികളുടെയും വോട്ട് വ്യത്യാസം ആറു ശതമാനമായിരുന്നു. ഇതിനിടെയാണ് ഇടത്തരക്കാർക്ക് അനുകൂലമാകുന്ന പ്രഖ്യാപനങ്ങൾ കൂടി കേന്ദ്രസർക്കാരിൻ്റെ ഭാഗത്തുനിന്ന് എത്തുന്നത്.2020ൽ രാജ്യതലസ്ഥാനത്തെ ന്യൂഡൽഹി നിയമസഭാ മണ്ഡലത്തിൽ എഎപിയാണ് വിജയിച്ചിരുന്നത്. വിവിധ ഗ്രേഡുകളിലുള്ള സർക്കാർ ഉദ്യോഗസ്ഥരുടെ താമസകേന്ദ്രമാണ് ന്യൂഡൽഹി മണ്ഡലം. ബജറ്റിലെ പ്രഖ്യാപനങ്ങൾ നേട്ടമാകുന്ന ഒരു വിഭാഗം കൂടിയാണ് ഇവർ.
പുതുക്കിയ ആദായ നികുതി സ്ലാബുകളും നിരക്കുകളും ഡൽഹി നിയമസഭാ തെരഞ്ഞടുപ്പിനെ സ്വാധീനിക്കുമെന്നാണ് രാഷ്ട്രീയ നിരീക്ഷകരെ ഉദ്ധരിച്ചുള്ള ദേശീയ മാധ്യമങ്ങളുടെ റിപ്പോർട്ട്. അതേസമയം ബിജെപിയുടെ തന്ത്രങ്ങൾ വോട്ടായി മാറുമോ എന്നറിയാൻ ഫലപ്രഖ്യാപന ദിവസമായ ഫെബ്രുവരി എട്ട് വരെ കാത്തിരിക്കണം. അഞ്ചിനാണ് വോട്ടെടുപ്പ് നടക്കുക.നഗരമേഖലകളിൽ ഉള്ള കുടുംബങ്ങളിൽ 67 ശതമാനവും ഇടത്തരക്കാരാണെന്നാണ് റിപ്പോർട്ട്. ഇതാണ് ഡൽഹി നിയമസഭാ തെരഞ്ഞെടുപ്പിൽ ഇടത്തരക്കാരുടെ വോട്ട് നിർണായകമാക്കുന്നത്.
ഹാട്രിക് വിജയം ലക്ഷ്യമിടുന്ന എഎപിയും ഭരണം പിടിച്ചെടുക്കാൻ ശ്രമിക്കുന്ന ബിജെപിയും പുറത്തിറക്കിയ പ്രകടന പത്രികകളിൽ ഇടത്തരക്കാർക്കായി ഒട്ടനേകം വാഗ്ദാനങ്ങൾ ഇടംപിടിച്ചിട്ടുണ്ട്.മൂന്നു പതിറ്റാണ്ടോളമായി ഡൽഹിയിൽ ഭരണത്തിലില്ലാത്ത ബിജെപി ഇക്കുറി അരയും തലയും മുറുക്കിയാണ് ഭരണം ലക്ഷ്യമിട്ട് പ്രചാരണം നടത്തുന്നത്. വമ്പൻ വാഗ്ദാനങ്ങൾ ഉൾക്കൊള്ളിച്ച് മൂന്നു ഘട്ടങ്ങളായി പ്രകടന പത്രിക പുറത്തിറക്കിയതിന് പിന്നാലെ ഇടത്തരക്കാർക്ക് അനുകൂലമാകുന്ന പ്രഖ്യാപനങ്ങൾ ബജറ്റിൽ കൂടി ഉൾപ്പെടുത്താനായത് ബിജെപിക്ക് നേട്ടമാകുമെന്ന വിലയിരുത്തലുകളുണ്ട്.
Find out more:
click and follow Indiaherald WhatsApp channel