ആ കുട്ടിക്ക് സംഭവിച്ചത് ഇതാണ്. കേസിൽ അറസ്‌റ്റിലായ രവി എന്നയാളുടെ പേരുവിവരങ്ങൾ വീഡിയോയിൽ പറയുന്നുണ്ട്. പുറത്തുവന്ന വീഡിയോ ദൃശ്യം പെൺകുട്ടി മരിക്കുന്ന സമയത്തുള്ളതല്ലെന്നാണ് റിപ്പോർട്ട്. മൊഴി രേഖപ്പെടുത്തുന്ന സമയത്ത് ചിത്രീകരിച്ച ദൃശ്യങ്ങളാകാം ഇതെന്നാണ് ജെഎൻ മെഡിക്കൽ കോളേജ് ആൻഡ് ഹോസ്‌പിറ്റൽ വ്യക്തമാക്കുന്നത്. എന്നാൽ പെൺകുട്ടിയുടെ മരണവുമായി ബന്ധപ്പെട്ട് നിലപാടറിയിച്ച സർക്കിൾ ഓഫീസർ ബ്രഹ്മ സിംഗ് പുറത്തുവന്ന വീഡിയോയെക്കുറിച്ച് പ്രതികരിക്കാൻ തയ്യാറായില്ല.
സ്ഥലത്ത് ജാതി സംഘർഷം ഉണ്ടാക്കാൻ ചിലർ ആസൂത്രിതമായ ശ്രമിച്ചുവെന്നാണ് ഉത്തർപ്രദേശ് എഡിജിപി പറയുന്നത്. സംഭവത്തിനു പിന്നിൽ പ്രവർത്തിച്ചവരെ തിരിച്ചറിഞ്ഞിട്ടുണ്ടെന്നും അവർക്കെതിരെ കർശന നടപടി സ്വീകരിക്കുമെന്നും പോലീസ് പറഞ്ഞു.



അതേസമയം, കഴുത്തിനേറ്റ പരിക്ക് മൂലമാണ് ഹാഥ്രസിൽ ബലാത്സംഗത്തിന് ഇരയായ പെൺകുട്ടി മരിച്ചതെന്ന് എന്നാണ് പോസ്റ്റ്മോർട്ടം റിപ്പോർട്ട് വ്യക്തമാക്കുന്നത്. പെൺകുട്ടിയുടെ സ്വകാര്യ ഭാഗങ്ങളിൽ പരിക്കുകളുണ്ട്, എന്നാലിത് ബലാത്സംഗത്തിനിടെ ഉണ്ടായതാണോയെന്ന് വ്യക്തമല്ല. കൂടുതൽ പരിശോധനയ്ക്കായി സാമ്പിളുകൾ അയച്ചിരിക്കുകയാണെന്നും റിപ്പോർട്ട് വ്യക്തമാക്കുന്നു.പെൺകുട്ടി ബലാത്സംഗത്തിന് ഇരയായിട്ടില്ലെന്ന് യുപി പോലീസ് വ്യക്തമാക്കുമ്പോഴാണ് വീഡിയോ പുറത്തുവന്നത്. പെൺകുട്ടി ബലാത്സംഗത്തിന് ഇരയായിട്ടില്ലെന്ന് യുപി പോലീസ് ഇന്നലെ വ്യക്തമാക്കിയിരുന്നു. ബലാത്സംഗം തെളിയിക്കുന്ന രീതിയിൽ ഫോറൻസിക് റിപ്പോർട്ടിൽ ഒന്നുമില്ല. ആന്തരികാവയവം പരിശോധിച്ചപ്പോൾ ബീജം കണ്ടെത്താനായിട്ടില്ല. അതിനാൽ ബലാത്സംഗം നടന്നുവെന്ന് പറയാൻ കഴിയില്ലെന്നും പോലീസ് പറഞ്ഞിരുന്നു.



ബലാത്സംഗത്തിനിരയായതായി ഉത്തർപ്രദേശിലെ ഹാഥ്രസിൽ മരിച്ച ദളിത് പെൺകുട്ടി പറയുന്ന വീഡിയോ പുറത്തുവന്നു. രണ്ട് പേർ ചേർന്നാണ് തന്നെ ബലാത്സംഗം ചെയ്‌തത്. അമ്മ വരുന്നത് കണ്ടതോടെ ഇവർ ഓടിരക്ഷപ്പെട്ടു. പ്രതികൾ മുൻപും പീഡിപ്പിക്കാൻ ശ്രമം നടത്തിയിരുന്നതായും പെൺകുട്ടി വീഡിയോയിൽ പറയുന്നുണ്ടെന്ന് ഹിന്ദു റിപ്പോർട്ട് ചെയ്യുന്നു.സംഭവത്തിൽ അലഹബാദ് ഹൈക്കോടതി സ്വമേധയാ കേസെടുത്തിരുന്നു. മനസാക്ഷിയെ നടുക്കുന്ന സംഭവമെന്നാണ് പെൺകുട്ടിയുടെ കൊലപാതകത്തെ കോടതി നിരീക്ഷിച്ചത്.



സംഭവത്തിൽ ഉന്നത സർക്കാർ ഉദ്യോഗസ്ഥർക്ക് ഹൈക്കോടതിയുടെ ലഖ്‌നൗ ബഞ്ച് നോട്ടീസ് അയച്ചു.പെൺകുട്ടിയുടെ മരണത്തിൽ ഉത്തർപ്രദേശ് പോലീസ് നടത്തുന്ന അന്വേഷണത്തിൽ വിശ്വാസമില്ലെന്നും കേസ് സിബിഐ അന്വേഷിക്കണമെന്നും പെൺകുട്ടിയുടെ കുടുംബം വ്യക്തമാക്കി. പോലീസിൻ്റെ ഭാഗത്ത് നിന്നുമുണ്ടാകുന്ന നടപടികൾ അംഗീകരിക്കാൻ കഴിയാത്തതാണെന്ന് പെൺകുട്ടിയുടെ പിതാവ് പറഞ്ഞു.വീടിന് പുറത്തിറങ്ങാൻ പോലുമാകാത്ത അവസ്ഥയാണ് നിലവിലുള്ളത്. വിടിന് സമീപത്തും ഗ്രാമത്തിലും പോലീസ് നിലയുറപ്പിച്ച സാഹചര്യമാണുള്ളതെന്നും അദ്ദേഹം പറഞ്ഞു.