మంత్రి సత్యకుమార్ మాట్లాడుతూ, భారతదేశంలో ఆయుర్వేద మార్కెట్ రోజురోజుకీ విస్తరిస్తోందని తెలిపారు. ప్రస్తుతం భారత్ నుంచి 25 దేశాలకు ఆయుర్వేద ఔషధాలు ఎగుమతి అవుతున్నాయని ఆయన వెల్లడించారు. ప్రపంచమంతా భారతీయ వైద్య విధానం వైపు ఆకర్షితమవుతోందని పేర్కొన్నారు. ఆయుష్ వైద్య విధానాన్ని పటిష్ఠం చేసి విస్తరించేందుకు ప్రభుత్వం తీవ్రంగా కృషి చేస్తోందని హామీ ఇచ్చారు. ఈ ఏడాది ఆయుష్ ఆసుపత్రుల్లో సుమారు 20 లక్షల మంది ఔట్‌పేషెంట్ సేవలు పొందినట్లు ఆయన వివరించారు.
ఆయుర్వేదం పట్ల గతంలో నెలకొన్న అపోహలను ఆయన ఎత్తి చూపారు. ఆయుర్వేదం లాభసాటి కాదనే భావనతో చాలా మంది ఎంబీబీఎస్ వైపు మళ్లారని విచారం వ్యక్తం చేశారు. గత వైసీపీ ప్రభుత్వం ఐదేళ్లలో నేషనల్ ఆయుష్ మిషన్ కింద కేవలం 38 కోట్ల రూపాయలు మాత్రమే ఖర్చు చేసిందని విమర్శించారు. తాము అధికారంలోకి వచ్చిన తర్వాత ఏడాదిలోనే 83 కోట్ల రూపాయల నిధులను వెచ్చించినట్లు తెలిపారు. గత ముఖ్యమంత్రి ఆయుర్వేదాన్ని బోగస్‌గా వ్యాఖ్యానించేవారని గుర్తు చేశారు.
దీర్ఘకాలిక రోగాలకు అల్లోపతిలో లభించని పరిష్కారాలు ఆయుర్వేదంలో ఉన్నాయని మంత్రి సత్యకుమార్ అన్నారు. ఆయుర్వేద వైద్యం ద్వారా సమగ్ర ఆరోగ్య సంరక్షణ సాధ్యమని ఆయన ఉద్ఘాటించారు. ఈ కార్యక్రమంలో వైద్యులు, ఆసుపత్రి సిబ్బంది, పలువురు ప్రముఖులు పాల్గొన్నారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి