ఇటీవల జరిగిన దిల్లీ అసెంబ్లీ ఎన్నికల్లో బిజెపి విజయం సాధించింది. సొంతంగానే మెజారిటీని దక్కించుకొని ప్రభుత్వాన్ని ఏర్పాటు చేసేందుకు బలాన్ని కలిగి ఉంది. ముఖ్యమంత్రి ఎవరు? అనే ప్రశ్నకు అనేక పేర్లు తెరపైకి వచ్చాయి.
బిజెపి ఢిల్లీ మాజీ అధ్యక్షుడు విజయేందర్ గుప్తా, సతీష్ ఉపాధ్యాయ్, పవన్ శర్మ, శిఖా రాయ్, ఆశిష్ సూద్, పర్వేష్ సాహిబ్ సింగ్, రవీంద్ర ఇంద్ర రాజ్ సింగ్, కైలాష్ గంగవాల్, అనిల్ గోయల్, రాజ్ కుమార్ భాటియా పేర్లు వినిపించాయి. వీటికి భిన్నంగా బీజేపీ అధిష్ఠానం రేఖా గుప్తా పేరును ఖరారు చేయడం.. ఢిల్లీ ముఖ్యమంత్రిగా ప్రకటించడం బుధవారం సాయంత్రం చక చకా జరిగిపోయాయి.
బిజెపి అధిష్టానం గతంలోనూ ముఖ్యమంత్రుల ఎంపికలో గోప్యత పాటించింది. ఛత్తీస్ గఢ్‌, రాజస్థాన్, మధ్యప్రదేశ్ ముఖ్యమంత్రుల ఎంపికలో చాలా జాగ్రత్తలు తీసుకుంది. మీడియా కోడై కోసినట్టుగా.. సోషల్ మీడియాలో వినిపించినట్టుగా కాకుండా కొత్త వ్యక్తులను ముఖ్యమంత్రులుగా నియమించింది. సామాజిక సమీకరణాలు, తాజా రాజకీయ పరిస్థితులు, భవిష్యత్తు అవకాశాలు.. వీటన్నిటిని పరిగణలోకి తీసుకొని ముఖ్యమంత్రులను బిజెపి అధిష్టానం నియమిస్తోంది.
ఢిల్లీ ముఖ్యమంత్రిగా ఎంపికైన రేఖా గుప్తా.. బినోయ్ సామాజిక వర్గానికి చెందినవారు. విద్యార్థి దశ నుంచి ఆమె రాజకీయాలలో చురుకైన పాత్ర పోషించారు. 1996 -97 కాలంలో ఢిల్లీ విశ్వవిద్యాలయంలో విద్యార్థి విభాగానికి అధ్యక్షురాలుగా పనిచేశారు. దక్షిణ ఢిల్లీ మేయర్ గా పనిచేశారు. ఇక ప్రస్తుతం ఆమె ఢిల్లీ బిజెపి జనరల్ సెక్రటరీగా ఉన్నారు. ఇటీవల షా లిమార్ బాగ్ నియోజకవర్గంలో పోటీ చేశారు. 68,200 ఓట్ల తేడాతో విజయం సాధించారు.
బుధవారం సాయంత్రం బిజెపి శాసనసభ పక్షం సమావేశమైంది. ఆ సమావేశంలోనే రేఖా గుప్తా పేరును బిజెపి ఎమ్మెల్యేలు ఏకగ్రీవంగా ఎన్నుకున్నారు. ఆ తర్వాత ఆ విషయాన్ని బిజెపి వెల్లడించింది. రేఖ గుప్తా ప్రమాణ స్వీకారం గురువారం ఢిల్లీలోని రాంలీలా మైదానంలో జరుగుతుంది.. ఈ కార్యక్రమానికి ప్రధానమంత్రి నరేంద్ర మోడీ, కేంద్ర హోం శాఖ మంత్రి అమిత్ షా హాజరవుతారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి