ఒకప్పుడు టాటూ లకు కాస్త దూరంగానే ఉండేవారు యువత. ఈ మధ్యకాలంలో మాత్రం టాటూ వేసుకోవడం అనేది ఒక స్టైల్ అని భావిస్తూ ఉన్నారు. ఈ క్రమంలోనే తమకు నచ్చిన డిజైన్ ను టాటూగా వేయించుకోవడం చేస్తున్నారు. అలా టాటూలు వేసుకుంటే తాము ఇంకా స్టైలిష్ గా కనిపిస్తామని నమ్ముతున్నారు. అయితే కొంతమంది ఎక్కడో చేతికో కాలికో టాటులు వేయించుకుంటుంటే ఇంకొంతమంది మాత్రం ఒళ్లంతా టాటూలు వేయించుకొని ఏకంగా మనుషులు కాదు రాక్షసులేమో అన్న విధంగా కనిపిస్తూ ఉండడం కూడా చూస్తూ ఉన్నాం. అయితే ఇలా టాటూలు వేసుకుంటే ఏదైనా అనారోగ్య సమస్యలు వస్తాయా.. లేదా అన్న విషయం ఎవరికీ తెలియదు.
అయితే ఇలా టాటూలు వేయించుకోవడం కారణంగా ఏకంగా బ్లడ్ క్యాన్సర్ వచ్చే ప్రమాదం ఉంది అని నిపుణులు హెచ్చరిస్తున్నారు. టాటూలతో లింఫోమా అనే బ్లడ్ క్యాన్సర్ వచ్చే ముప్పు 21% అధికంగా ఉంటుందని స్వీడన్ సైంటిస్టులు ఇటీవల వెల్లడించారు. 20 నుండి 60 ఏళ్ల వయస్సున్న 11905 మందిపై అధ్యయనం చేశారు నిపుణులు. చర్మంపై టాటూ ఇంకు పడగానే రోగ నిరోధక వ్యవస్థ ప్రభావానికి గురవుతుందట. చర్మం ద్వారా ఇంక్ లింప్ నోడ్స్ లో పేరుకుపోయి.. చివరికి లింపోమా క్యాన్సర్ రావచ్చు అని చెబుతున్నారు నిపుణులు . అయితే టాటూ సైజును బట్టి తీవ్రత పెరిగే అవకాశం ఉంటుందని.. ఇక రానున్న రోజుల్లో దీనిపై మరిన్ని పరిశోధనలు జరుపుతాము అంటూ నిపుణులు చెప్పుకొచ్చారు.