అన్నమయ్య జిల్లాలోని ఈ పవిత్ర క్షేత్రం రామభక్తులకు స్వర్గధామం కంటే ఏ మాత్రం తీసిపోదు. పురాణాల ప్రకారం, లక్ష్మణ, భరత, శతృఘ్న, హనుమంతులతో సీతా సమేతంగా ఉన్న పట్టాభిరాముడి విగ్రహాన్ని సాక్షాత్తు జాంబవంతుడే ఇక్కడ ప్రతిష్టించాడని చెబుతారు. ఇంకో విశేషం ఏంటంటే, ఈ విగ్రహం వల్మీకంలో (పుట్టలో) బయటపడటం వల్లనే ఈ ఊరికి వాల్మీకిపురం అనే పేరు వచ్చిందంటారు.
తిరుమల తిరుపతి దేవస్థానం (TTD) ఆధ్వర్యంలో ఈ ఆలయం మరింత శోభాయమానంగా మారింది. 1997లో ttd ఈ ఆలయ బాధ్యతలు చేపట్టి, 2005లో అష్టబంధన మహా సంప్రోక్షణ నిర్వహించి, ఆలయాన్ని పునరుద్ధరించింది. ప్రతి సంవత్సరం చైత్ర మాసంలో జరిగే నవాహ్నిక బ్రహ్మోత్సవాలు ఇక్కడ ప్రధాన ఆకర్షణ. వీటితో పాటు శ్రావణ మాసంలో పట్టాభిషేకం, ఆశ్వయుజ మాసంలో పవిత్రోత్సవాలు కూడా శాస్త్రోక్తంగా నిర్వహిస్తారు.
ఈ ఏడాది ఏప్రిల్ 3 నుంచి 12 వరకు తొమ్మిది రోజుల పాటు బ్రహ్మోత్సవాలు జరగనున్నాయి. రోజూ ఉదయం, రాత్రి వేళల్లో కన్నుల పండువగా వాహన సేవలు జరుగుతాయి. భక్తులు ఈ ఉత్సవాల్లో పాల్గొని శ్రీరాముడి కృపకు పాత్రులు కావాలని ttd కోరుతోంది.
వాహన సేవల విశేషాలు:
ఏప్రిల్ 3: ధ్వజారోహణతో ఉత్సవాలకు ప్రారంభం, రాత్రి గజ వాహనంపై రామయ్య విహారం.
ఏప్రిల్ 4: ముత్యపు పందిరి వాహనం ఊరేగింపు, రాత్రి హనుమంతుని వాహనంపై రాముడు.
ఏప్రిల్ 5: కల్పవృక్ష వాహనంపై భక్తులకు దర్శనమివ్వనున్న రామయ్య, రాత్రి సింహ వాహనంపై ఊరేగింపు.
ఏప్రిల్ 6: సర్వభూపాల వాహనం, రాత్రి పెద్ద శేష వాహనంపై రామయ్య.
ఏప్రిల్ 7: సూర్యప్రభ వాహనం ఉదయం, రాత్రి చంద్రప్రభ వాహనం, పల్లకీలో మోహినీ అవతారంలో రామయ్య.
ఏప్రిల్ 8: తిరుచ్చి ఉత్సవం, రాత్రి సీతారాముల కల్యాణోత్సవం అంగరంగ వైభవంగా, ఆ తర్వాత గరుడ వాహనంపై రామయ్య.
ఏప్రిల్ 9: రథోత్సవం కనులవిందుగా, రాత్రి ధూళీ ఉత్సవం.
ఏప్రిల్ 10: తిరుచ్చి ఉత్సవం, రాత్రి అశ్వవాహనం, పార్వేట ఉత్సవం.
ఏప్రిల్ 11: వసంతోత్సవం, చక్రస్నానం, రాత్రి హంస వాహనం, ధ్వజావరోహణంతో బ్రహ్మోత్సవాలు ముగింపు.
ప్రత్యేక ఆకర్షణలు:
ఏప్రిల్ 8న రాత్రి జరిగే సీతారాముల కల్యాణోత్సవం ప్రధాన ఆకర్షణ. కేవలం రూ. 500 చెల్లించి గృహస్తులు ఈ వేడుకలో పాల్గొనవచ్చు. అంతేకాదు, పాల్గొన్న దంపతులకు ఉత్తరీయం, రవికె, లడ్డూ ప్రసాదం కూడా బహుమతిగా ఇస్తారు.
ఏప్రిల్ 12న స్వామి, అమ్మవార్లకు స్నపన తిరుమంజనం, సాయంత్రం పుష్పయాగం కన్నుల పండుగగా జరుగుతాయి. ttd హిందూ ధర్మప్రచార పరిషత్, అన్నమాచార్య ప్రాజెక్టు ఆధ్వర్యంలో రోజూ సాంస్కృతిక కార్యక్రమాలు కూడా ఉంటాయి. ఇంతటి విశిష్టమైన వాల్మీకిపురం బ్రహ్మోత్సవాలకు తరలిరండి, శ్రీరాముని అనుగ్రహాన్ని పొందండి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి