ముందుగా టాలీవుడ్ సినిమాల్లో అక్కడక్కడా చిన్న చిన్న పాత్రలు చేస్తూ కొనసాగిన రవితేజ, ఆ పాత్రల్లో తన నటనతో అందరినీ ఆకట్టుకున్నారు. ఆపై కొన్నేళ్ల తరువాత శ్రీనువైట్ల దర్శకత్వంలో తెరకెక్కిన నీకోసం సినిమాతో హీరోగా మారిన రవితేజ, ఆ సినిమాతో యావరేజ్ విజయాన్ని అందుకున్నారు. కాగా ఆ సినిమాకు రవితేజ స్పెషల్ జ్యురీ అవార్డు అందుకున్నారు. అనంతరం మళ్ళి క్యారెక్టర్ ఆర్టిస్ట్ గా పలు సినిమాలు చేస్తూ కొనసాగిన రవితేజకు, 2001లో ఇట్లు శ్రావణి సుబ్రహ్మణ్యం సినిమా ద్వారా పూరి జగన్నాథ్ హీరోగా అవకాశం ఇవ్వడం, రిలీజ్ తరువాత ఆ సినిమా మంచి సక్సెస్ ని అందుకోవడం జరిగింది.
ఆపై పూరి తో రవితేజ చేసిన ఇడియట్, అమ్మ నాన్న ఓ తమిళ అమ్మాయి సినిమాలు సూపర్ హిట్స్ సాధించి హీరోగా రవితేజకు మంచి క్రేజ్ తీసుకువచ్చాయి. ఇక అక్కడి నుండి హీరోగా వరుస సినిమాలు చేస్తూ ముందుకు సాగిన రవితేజ, మధ్యలో మంచి సక్సెస్ లు అందుకున్నారు. అయితే ఇటీవల కొంత కాలంగా మాత్రం ఆయనను వరుసగా అపజయాలు వెంటాడుతున్నాయి. మూడేళ్ళ క్రితం యువ దర్శకుడు అనిల్ రావిపూడి దర్శకత్వంలో తెరకెక్కిన రాజా ది గ్రేట్, ఆ కెరీర్ లో ఆఖరి సక్సెస్ అని చెప్పాలి. ఆ తరువాత ఆయన నటించిన టచ్ చేసి చూడు, నేల టిక్కెట్టు, అమర్ అక్బర్ ఆంటోనీ, డిస్కో రాజా వంటి సినిమాలు అన్నీ కూడా బాక్సాఫీస్ దగ్గర ఘోర పరాజయం పాలయ్యాయి.
ప్రస్తుతం గోపీచంద్ మలినేని దర్శకత్వంలో క్రాక్ తో పాటు, అతి త్వరలో రమేష్ వర్మ దర్శకత్వంలో మరొక సినిమా చేయనున్న రవితేజ, వాటితో కనుక సక్సెస్ అందుకోకపోతే, రాబోయే రోజుల్లో ఆయన కెరీర్ కొంత ఇబ్బందుల్లో పడడం ఖాయం అని అంటున్నారు సినీ విశ్లేషకులు. మరి ప్రస్తుతం కొనసాగుతున్న ఈ అపజయాల పరంపరకు రాబోయే సినిమాలతో మాస్ రాజా ఎంతవరకు హిట్ కొట్టి అడ్డుకట్ట వేస్తారో చూడాలి. మరోవైపు ఆయన ఫ్యాన్స్ కూడా ఈసారి మాత్రం గట్టిగా కొట్టాల్సిందే రాజా అంటూ పలు సోషల్ మీడియా మాధ్యమాల్లో కామెంట్స్ చేస్తున్నారు.....!!
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి