రెబల్ స్టార్ నట వారసుడిగా ఈశ్వర్ సినిమాతో తెలుగు తెరకు పరిచయమయ్యాడు ఉప్పలపాటి ప్రభాస్ రాజు. పెదనాన్న ఇచ్చిన ప్రోత్సాహంతో తనని తానుగా ప్రూవ్ చేసుకునేందుకు చాలానే కష్టపడ్డాడు ప్రభాస్. ఈశ్వర్ సినిమా టైంలోనే కుర్రాడి కటౌట్ బాగుంది ఫ్యూచర్ లో స్టార్ అవుతాడని చాలామంది అన్నారట. అదే నిజం చేస్తూ రికార్డుల రారాజుగా మారాడు ప్రభాస్. తెలుగు సినిమా చరిత్రలో బాహుబలితో చెరిగిపోని ముద్ర వేసుకున్నాడు ప్రభాస్. బాహుబలికి ముందు బాహుబలి తర్వాత తెలుగు సినిమా అనుకునేలా చేశాడు.
ఈశ్వర్ తో ఎంట్రీ :
జయంత్ సి పరాంజీ డైరక్షన్ లో వచ్చిన ఈ సినిమాతో హీరోగా ఎంట్రీ ఇచ్చిన ప్రభాస్ హీరో అంటే ఇలానే ఉండాలి అనిపించేలా చేశాడు. ఆ తర్వాత రాఘవేంద్ర సినిమా చేయగా అది కాస్త నిరాశపరచింది. ఇక మూడవ సినిమానే వర్షం సూపర్ హిట్ గా నిలిచింది. శోభన్ డైరక్షన్ లో వచ్చిన వర్షం ప్రభస్ కెరియర్ ను నిలబడేలా చేసింది.
ఛత్రపతితో కెరియర్ టర్న్ :
వర్షం తో వచ్చిన క్రేజ్ తో మాస్ ఇమేజ్ సంపాదించిన ప్రభాస్ ఆ తర్వాత అడివి రమౌడు, చక్రం సినిమాలు చేశాడు. అడివి రాముడు ఆకట్టుకున్న సరే కృష్ణవంశీ డైరక్షన్ లో వచ్చిన చక్రం భారీ అంచనాలతో వచ్చి నిరాశపరచింది. ఆ తర్వాత పౌర్ణమి, యోగి, మున్నా, బుజ్జిగాడు, బిల్లా సినిమాలతో ఆకట్టుకున్న ప్రభాస్ పూరితో ఏక్ నిరంజన్ తీసి జస్ట్ ఓకే అనిపించుకున్నాడు. కరణాకరణ్ డైరక్షన్ లో డార్లింగ్ సినిమా చేసిన ప్రభాస్ ఆ సినిమాతో సూపర్ హిట్ అందుకున్నాడు.
మిర్చి తో క్లాస్ హిట్ :
ఈమధ్యలో మిస్టర్ పర్ఫెక్ట్, రెబెల్ సినిమాలు తీసిన ప్రభాస్ కొరటాల శివ డైరక్షన్ లో వచ్చిన మిర్చి సినిమాతో హిట్ అందుకున్నాడు. ఇక మిర్చి తర్వాత రాజమౌళి సినిమా కోసం ఏకంగా ఐదేళ్ళు రాసిచ్చేశాడు.
మహేంద్ర బాహుబలి వీరత్వం :
రాజంటే రాజ్యాలను గెలవడమే కాదు రాజ్య ప్రజల మనసులు గెలవాలి. రాజమౌళి తెరకెక్కించిన బాహుబలి సినిమాతో ప్రభాస్ కెరియర్ లో పది మెట్లు పైకెదిగాడు. అమరేంద్ర బాహుబలి, మహేంద్ర బాహుబలి రెండు పాత్రల్లో బాహుబలి నిజంగా ఉంటే ఇలానే ఉంటాడేమో అనే తరహాలో ప్రభాస్ నటన ఉంది.
తెలుగు సినిమా చరిత్రలో ఇదివరకు ఎన్నడు వినిపించని.. కనిపించని రికార్డులు, రివార్డులు అందుకుని ప్రభాస్ తన స్టామినా ప్రూవ్ చేసుకున్నాడు. బాహుబలి తర్వాత వచ్చిన సాహో ఆశించిన స్థాయిలో లేకపోయినా హిందీలో ఈ సినిమా మంచి వసూళ్ళు రాబట్టింది.
ప్రస్తుతం ప్రభాస్ రాధాకృష్ణ డైరక్షన్ లో రాధే శ్యామ్ సినిమా చేస్తున్నాడు. పిరియాడికల్ లవ్ స్టోరీగా రాబోతున్న ఈ సినిమా నుండి వచ్చిన ఫస్ట్ లుక్ సినిమాపై అంచనాలు పెంచింది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి