ఇన్నాళ్లు స్టార్ హీరోగా ఎన్నో సూపర్ హిట్ చిత్రాల్లో నటించిన విజయ్.. ఇప్పుడు రాజకీయాల్లోకి అడుగుపెట్టారు. ఇటీవలే తమిళ వెట్రి కళగం పేరుతో సొంతంగా పార్టీని ఏర్పాటు చేశారు. ఏప్రిల్ 19న తమిళనాడు, పుదుచ్చేరిలో మొత్తం 40 పార్లమెంట్ స్థానాలకు ఎన్నికలు జరిగాయి. ఈ ఎన్నికల్లో ఓటు వేసేందుకు రష్యా నుంచి చెన్నై వచ్చారు. ఎయిర్ పోర్టు నుంచి నేరుగా ఆయన ఇంటికి వెళ్లారు విజయ్. అప్పటికే వందల మంది అభిమానులు విజయ్ ఇంటి వద్ద వెయిట్ చేస్తున్నారు. అభిమానులను ప్రేమగా పలకరించిన విజయ్.. అనంతరం ఓటు హక్కును వినియోగించుకున్నారు.
దాదాపు 200 మంది అభిమానులతో కలిసి పోలింగ్ బూత్ వద్దకు విజయ్ వచ్చి ఓటు వేశారని.. అంతమంది జనాలు పోలింగ్ బూత్ లోకి రావడంతో అక్కడున్నవారికి ఇబ్బంది కలిగిందని ఓ సామాన్య వ్యక్తి విజయ్ పై పోలీస్ కమిషనర్ కార్యాలయంలో ఫిర్యాదు చేశారు. 200 మందితో వచ్చి ఓటేసేందుకు వచ్చిన ప్రజలకు విజయ్ ఇబ్బంది కలిగించాడని… ఎన్నికల నియమావళిని ఉల్లంఘించిన విజయ్ పై తగిన చర్యలు తీసుకోవాలని కోరుతున్నట్లు ఫిర్యాదులో పేర్కొన్నాడు. దీంతో ఓటు వేయడానికి వచ్చిన విజయ్ అనుకోకుండానే మరో వివాదంలో చిక్కుకున్నాడు.