అల్లు అర్జున్‌ను నాంపల్లి కోర్టులో హాజరు పరచగా, కోర్టు ఆయనకు 14 రోజుల జ్యుడీషియల్ కస్టడీ విధించింది. దీంతో ఆయనను శుక్రవారం రాత్రి చంచల్‌గూడ సెంట్రల్ జైలుకు తరలించారు. అయితే, తెలంగాణ హైకోర్టు ఆయనకు మధ్యంతర బెయిల్ మంజూరు చేయడంతో శనివారం తెల్లవారుజామున విడుదలయ్యారు.
కోర్టు ఆదేశాల మేరకు అల్లు అర్జున్‌ను ప్రత్యేక తరగతి ఖైదీగా పరిగణించారని అధికారులు తెలిపారు. మంజీరా బ్యారక్-1లోని జైలు విభాగంలో ఆయనకు మంచం, టేబుల్, కుర్చీ వంటి కనీస సౌకర్యాలు కల్పించారు. జైలు అధికారుల ప్రకారం, నటుడు జైలులో ఉన్న సమయంలో ప్రశాంతంగా, సహకారంగా ఉన్నారు. అయితే కొన్ని రిపోర్ట్స్ ప్రకారం బన్నీ తనని ఎప్పుడు ఇంటికి పంపిస్తారో చెప్పాలంటూ అధికారులను పదే పదే అడిగినట్లుగా తెలిసింది.
ఇదిలా ఉండగా, ఆయన భోజనం మానేశారని, రాత్రంతా మేల్కొని ఉన్నారని వస్తున్న వార్తలను జైలు అధికారులు వాటిని ఖండించారు. అల్లు అర్జున్ రాత్రి భోజనంలో అన్నం, కూరగాయల కూర తిన్నారని వారు స్పష్టం చేశారు. ఆయన శుక్రవారం సాయంత్రం 6:30 గంటలకు జైలుకు చేరుకోగా, శనివారం ఉదయం 6:20 గంటలకు విడుదలయ్యారు.
హైకోర్టు బెయిల్ ఉత్తర్వులు ఉన్నప్పటికీ జైలు అధికారులు ఆయన విడుదలను ఆలస్యం చేశారని ఆయన న్యాయవాది ఆరోపించగా, అధికారులు ఆ వాదనను ఖండించారు. బెయిల్ ఉత్తర్వుల భౌతిక కాపీ రాత్రి 11:30 గంటలకు వచ్చిందని, సాధారణంగా అత్యవసర పరిస్థితుల్లో తప్ప సాయంత్రం 7 గంటల తర్వాత ఖైదీలను విడుదల చేయరని వారు వివరించారు.
విడుదల తర్వాత అల్లు అర్జున్ మీడియాతో కొద్దిసేపు మాట్లాడారు. తాను క్షేమంగా ఉన్నానని, అభిమానులు, మద్దతుదారులు ఆందోళన చెందాల్సిన అవసరం లేదని ఆయన భరోసా ఇచ్చారు. "నేను చట్టాన్ని గౌరవిస్తాను, నాకు అండగా నిలిచిన ప్రతి ఒక్కరికి ధన్యవాదాలు" అని ఆయన అన్నారు
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి