టాలీవుడ్ స్టార్ హీరో, మెగా పవర్ స్టార్, గ్లోబల్ స్టార్ రామ్ చరణ్ గురించి జనాలకు పరిచయం అక్కర్లేదు. తండ్రి మెగాస్టార్ చిరంజీవి వారసుడిగా తెలుగు చిత్ర పరిశ్రమలోకి అడుగిడిన రామ్ చరణ్, అనతికాలంలోనే తనదైన మార్కెట్ ఇక్కడ సంపాదించుకొని, అగ్రహీరోలతో ఒకడిగా వెలుగొందుతున్నాడు. అసలు విషయంలోకి వెళితే... రామ్ చరణ్ తాజా సినిమా "గేమ్ చేంజర్." ప్రముఖ తమిళ దర్శకుడు శంకర్ ఈ సినిమాకి దర్శకత్వం వహించగా కియార అద్వానీ ఈ సినిమాలో చరణ్ కి జోడిగా నటించింది. అదేవిధంగా ఈ సినిమాలో హీరోయిన్ అంజలి, శ్రీకాంత్, సునీల్, నవీన్ చంద్ర, జయరాం వంటి వారు ముఖ్య పాత్రలలో నటించారు. కాగా ఈ సినిమాపైన అభిమానులు తారాస్థాయిలో అంచనాలు పెట్టుకున్నారు.
మరోవైపు ఈ సినిమాలో ఎస్ జె సూర్య విలన్ పాత్రలో నటించగా... ఎస్ ఎస్ తమన్ ఈ సినిమాకు సంగీతం అందించాడు. శ్రీ వెంకటేశ్వర క్రియేషన్స్ బ్యానర్ పై దిల్ రాజు ఈ మూవీని ఎంతో ప్రతిష్టాత్మకంగా నిర్మించాడు. ఈ మూవీ ని ఈ సంవత్సరం సంక్రాంతి పండుగ సందర్భంగా జనవరి 10 వ తేదీన విడుదల చేస్తున్న సంగతి విదితమే. కాగా ఈ సినిమాకు తెలుగు సినిమా పరిశ్రమ నుండి పోటీగా డాకు మహారాజ్, సంక్రాంతికి వస్తున్నాం సినిమాలు పోటీ రాగా, తమిళం నుండి ఎలాంటి సినిమా విడుదల కావడం లేదని నిన్నటి వరకు అనుకున్నాం. కానీ ప్రస్తుతం అందుతున్న సమాచారం మేరకు తమిళ సినిమా పరిశ్రమ నుండి ఈ మూవీ కి గట్టి పోటీ ఎదురయ్యే అవకాశాలు స్పష్టంగా కనబడుతున్నాయి.
జనవరి 10వ తేదీన తమిళ స్టార్ హీరో అజిత్ కుమార్ హీరోగా రూపొందిన "విడమియర్చి" సినిమాను మొదట విడుదల చేయనున్నట్లు మేకర్స్ ప్రకటించగా ఈ సినిమాను తాజాగా పోస్ట్ పోన్ చేస్తున్నట్లు మేకర్స్ ప్రకటించారు. దానితో గేమ్ చేంజర్ కు చాలా కలిసి వస్తుంది అని అంతా అనుకున్నారు. కానీ అజిత్ కుమార్ సినిమా పోస్ట్ పోన్ కావడంతో ఏకంగా 6 తమిళ చిన్న సినిమాలు అక్కడ విడుదలకు రెడీ అయినట్టు తెలుస్తోంది. కాదలిక్కు నేరమిల్లై, వనంగన్, పదవి తలైవన్, టెన్ అవర్స్, మద్రాస్ కారన్, తరుణం అనే సినిమాలను సంక్రాంతి పండక్కు విడుదల కావడానికి రెడీ అయినట్టు విశ్వసనీయ వర్గాల సమాచారం. ఇలా ఒక సినిమా పోయి గేమ్ చేంజర్ మూవీకి ఏకంగా 6 సినిమాలు తమిళ ఇండస్ట్రీ లో పోటీ కావడంతో అక్కడ గేమ్ చేంజర్ సినిమాకు ఎటువంటి రిషప్షన్ వస్తుందో అని అభిమానులు ఎదురు చూస్తున్నారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి