తెలుగు రాష్ట్రాల్లో ఇప్పుడు పొలిటికల్ వాతావరణం హీటెక్కింది. అసెంబ్లీ సమావేశాలు ప్రారంభం కావడంతో రాజకీయ సన్నివేశాలు వేడెక్కుతున్నాయి. అటు ఆంధ్రా, ఇటు తెలంగాణ ఒకేసారి రెండు రాష్ట్రాల బడ్జెట్ సమావేశాలు ప్రారంభం కావడంతో అందరి దృష్టీ ఆ సమావేశాలపైనే ఉంది.
ఐతే.. రెండు రాష్ట్రాల్లో భిన్నమైన వాతావరణం కనిపిస్తోంది. ఆంధ్రా అసెంబ్లీ మాంచి వాడి వేడి మీద ఉంటే.. దానితో పోల్చుకుంటే.. తెలంగాణ అసెంబ్లీ కాస్త కూల్ కూల్ గానే సాగిపోతోంది. ఆంధ్రాలో టీడీపీ- వైసీపీల మధ్య రాజకీయ సమరం తీవ్రవాగ్యుద్దాలకు, స్పీకర్లపై ఆరోపణలకు, దారి తీస్తుంటే.. తెలంగాణ అప్పుడప్పడు గొడవలైనా ఓవరాల్ గా బాగానే సాగుతోంది.
జగన్- చంద్రబాబు ఈ సమావేశాల్లో ఇప్పటివరకూ డైరెక్టుగా వాగ్వాదాలకు దిగకపోయినా.. సూటిపోటి విమర్శలు చేసుకున్నారు. జగనైతే ఏకంగా కడిగేస్తా అంటూ శివాలెత్తిపోయాడు. ఈసారి మాంచి దూకుడు మీదున్న జగన్.. మొదటి నుంచి స్పీకర్ ప్రవర్తనపై ఆవేశకావేశాలకు పోతున్నాడు. కోడెలనే టార్గెట్ చేసుకుని మండిపడుతున్నాడు.
ఈ విషయంలో మాత్రం తెలంగాణ చాలా బెటరనే చెప్పుకోవాలి. అక్కడ కేసీఆర్- జానారెడ్డి మధ్య ఇలాంటి సీన్లు మచ్చుకైనా కనిపించడం లేదు. సీఎల్పీ నేత జానారెడ్డి టీఆర్ఎస్ పట్ల చాలా మెతకగా వ్యవహరిస్తున్నట్టు విమర్శలు వస్తున్నా.. ఆయన మాత్రం పద్దతిగానే నడుచుకుంటున్నాడు. ఇక కేసీఆరైతే.. జానారెడ్డికి విపరీతమైన గౌరవం ఇస్తూ మాట్లాడుతున్నారు. ఈ విషయంలో మాత్రం ఇలాంటి సీన్లు ఆంధ్రా నుంచి ఊహించలేం. కాకపోతే.. తెలంగాణలో ప్రధాన ప్రతిపక్షం కంటే కొసరు పక్షం టీడీపీనే ప్రధాన ప్రతిపక్ష పాత్ర పోషిస్తూ.. ఆ లోటు తీరుస్తోంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి