కృష్ణపట్నం ఆనందయ్య నాటు మందుపై ఏపీ హైకోర్టులో హౌస్ మోషన్‌ పిటిషన్‌ దాఖలైంది. పిటిషన్‌ అనుమతి కోసం హైకోర్టు న్యాయవాది యలమంజుల బాలాజీ దరఖాస్తు చేశారు. కరోనా నివారణ కోసం ఆనందయ్య ఆయుర్వేద మందు పంపిణీ చేస్తున్నారని, ఈ మందు తీసుకుని అనేక మంది కోలుకున్నారని పిటిషనర్ పేర్కొన్నారు. అకస్మాత్తుగా రాష్ట్ర ప్రభుత్వం ఆనందయ్య మందు పంపిణీని నిలిపివేసిందని, దీనివల్ల అనేక మంది ఈ మందును తీసుకోలేకపోతున్నారని పిటిషనర్ హైకోర్టుకు తెలిపారు. ఆనందయ్య మందు పంపిణీపై ఉత్కంఠ కొనసాగుతోంది. ఈ మందులో ఎలాంటి హానికర పదార్థాలు లేవని ఆయుష్ తేల్చింది. ఆనందయ్య వాడుతున్న మూలికలను, తయారీ పద్ధతిని పరిశీలించిన ఏపీ ఆయుష్ కమిషనర్ రాములు ఈ మందులో ఎలాంటి హానికర పదార్థాలను వాడటం లేదని వెల్లడించారు. అయినప్పటికీ శాస్త్రీయత ధృవీకరణ జరిగే వరకు ఆనందయ్య మందును నాటుమందుగానే పరిగణిస్తామని రాములు చెప్పారు. అలాగే ఐసీఎంఆర్ సైతం ఈ మందుపై పరిశోధనలు చేస్తోంది.మరో వైపు ప్రజలు ఈ మందు మళ్లీ ఎప్పుడు అందుబాటులోకి వస్తోందోనని ఎదురుచూస్తున్నారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి