తొలి నుంచి గన్నవరం నియోజకవర్గంలో టీడీపీ బలంగా ఉంది. క్యాడర్ కూడా సరైన నాయకుడి కోసం ఇన్నాళ్లుగా ఎదురు చూసింది. యార్లగడ్డ వెంకట్రావు టీడీపీలో చేరడం, వంశీపై గెలవాలని ఆయన కృతనిశ్చయంతో ఉండడంతో ఆయనకు పార్టీ టికెట్ కేటాయించింది. ఇక్కడ టీడీపీ నుంచి గెలిచిన వంశీ తమ పార్టీ అధినేత చంద్రబాబుపై వ్యక్తిగత వ్యాఖ్యలు చేశారు. ఆ విమర్శలు పరిధి దాటాయని టీడీపీ భావిస్తోంది. లోకేష్ తల్లి, చంద్రబాబు భార్య భువనేశ్వరిని అవమానించేలా వంశీ వ్యాఖ్యలు చేశారని టీడీపీ ఆగ్రహంగా ఉంది. దీంతోపాటు నియోజకవర్గంలో టీడీపీ ఆఫీసును తగులబెట్టడం వంటివి ఆ పార్టీలో మరింత ఆగ్రహాన్ని పెంచేలా చేశాయి. ఇప్పటికే అక్కడ పార్టీ బలంగా ఉండడం, దీనికి తోడు బీజేపీ, జనసేనతో కలిసి కూటమిగా పోటీ చేస్తుండడం ఆ పార్టీకి లాభించనుంది. ఖచ్చితంగా అక్కడ గెలుస్తామని, విర్రవీగిన వంశీని ఓడించి బుద్ధి చెప్పాలని టీడీపీ భావిస్తోంది. ఇక ప్రచారంలో మీడియాతో యార్లగడ్డ మాట్లాడుతూ, కార్యకర్తల మద్దతుతో గన్నవరంలో కూటమి అభ్యర్థిగా విజయం సాధిస్తానని విశ్వాసం వ్యక్తం చేశారు. గన్నవరంలో మెజారిటీ వైసీపీ శ్రేణులు, నియోజకవర్గ అభివృద్ధిని కాంక్షించే తటస్థులు కూడా తనకు ఓట్లు వేసి గెలిపిస్తారన్న నమ్మకాన్ని ఆయన వ్యక్తం చేశారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి