ఏపీ ప్రభుత్వం ఆదాయ మార్గాలపై దృష్టి సారించింది. ప్రజల నుంచి పెద్ద ఎత్తున పన్నులు వసూలు చేసేందుకు రంగం సిద్ధం చేస్తోంది. ముఖ్యంగా రహదారుల నిర్మాణానికి టోల్ వసూలు చేసేందుకు ముమ్మర కసరత్తులు చేస్తోంది. ప్రభుత్వ, ప్రైవేట్ భాగస్వామ్యంతో రోడ్లను బాగు చేసేందుకు ఈ నిర్ణయం తీసుకున్నట్లు అధికార వర్గాలు చెబుతున్నాయి.


ఈ మేరకు తమ నిర్ణయాన్ని ఏపీ ప్రభుత్వం అధికారికంగా ప్రకటించకపోయినా.. గత రెండు, మూడు రోజులుగా సోషల్ మీడియాలో ఇదే చర్చ నడుస్తోంది. కూటమి ప్రభుత్వం అధికారంలోకి వచ్చిన తర్వాత ఆదాయ మార్గాలపై అన్వేషణ మొదలు పెట్టింది. రాష్ట్ర ఆర్థిక పరిస్థితి బాగా లేకపోవడం, సూపర్ సిక్స్ హామీలకు పెద్ద ఎత్తున నిధులు అవసరం కావడంతో ఏం చేయాలో అర్థం కాక కూటమి పెద్దలు తలలు పట్టుకుంటున్నారు. ఇలాంటి సమయాల్లో అవకాశం ఉన్న ప్రతిదానిపై డబ్బులు వసూలు చేసేందుకు సిద్ధం అవుతున్నారు.


గత పదేళ్ల వైసీపీ పాలనలో రహదారులు గోతుల మయంగా మారడం, వాటికి మరమ్మతులు చేపట్టకపోవడం వంటి కారణాలతో ప్రజల్లో ప్రభుత్వంపై అసంతృప్తి రేగింది. సంక్షేమానికి పెద్ద ఎత్తున ఖర్చు చేసినా మౌలిక వసతుల కల్పనలో మాత్రం విఫలం అయింది. ఈ తరుణలంలో అధికారంలోకి వచ్చిన కూటమి రహదారుల నిర్మాణంపై ప్రత్యేక దృష్టి సారించింది.


రాష్ట్ర వ్యాప్తంగా ప్రతి గ్రామంలో రహదారుల నిర్మాణాలకు కసరత్తులు ప్రారంభించింది. అయితే ఇది వరకు జాతీయ, అంతర్రాష్ట్ర రహదారులపై టోల్ ప్లాజాలు ఏర్పాటు చేసేవారు. కానీ ఇప్పుడు కూటమి ప్రభుత్వం ఆర్ అండ్ బీ రోడ్లకు కూడా వర్తింపజేయనుంది. తద్వారా సామాన్య ప్రజలపై టోల్ భారం పడనుంది. ఇందులో ఆటోలు, ట్రాక్టర్లు, ద్విచక్రవాహనాలు తదితర వాహనాలు ఉండనున్నాయి. వీటన్నింటి నుంచి ఇప్పుడు టోల్ వసూలు చేస్తారనే ఊహాగానాలు వెలువడుతున్నాయి. ఇప్పటికే టోల్ భారం మోయలేకపోతున్న వారికి ఇది మరో గుదిబండగా మారనుంది. రాష్ట్ర ప్రభుత్వం నుంచి అధికారిక ఉత్తర్వులు రాకపోయినా దీనిని స్పష్టత ఇవ్వాల్సిన అవసరం ఉంది. మరి దీనిపై ప్రజలు ఏ విధంగా స్పందిస్తారో చూడాలి.
మరిన్ని ఇంట్రెస్టింగ్ అప్ డేట్స్ కోసం wa క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి

మరింత సమాచారం తెలుసుకోండి:

cbn

Chakravarthi Kalyan

03/08/2024 06:54 AM