తాను అధ్యక్షుడిగా ఉంటే యుద్ధమే మొదలయ్యేది కాదని ట్రంప్ అన్నారు. రష్యా, ఉక్రెయిన్ వెంటనే కాల్పుల విరమణకు చర్చలు జరపాలని కోరారు. "నేను అధ్యక్షుడిగా ఉంటే అసలు ఈ యుద్ధమే మొదలయ్యేది కాదు. దీన్ని వెంటనే ఆపేద్దాం." అని ఆయన స్పష్టం చేశారు. హింసను కొనసాగించడం కంటే శాంతియుతంగా పరిష్కరించుకోవడమే ఉత్తమం అని నొక్కి చెప్పారు.
గతంలో పుతిన్‌తో తనకున్న సంబంధాల గురించి మాట్లాడుతూ, రష్యా అధ్యక్షుడితో మంచి సంబంధాలు కలిగి ఉన్నానని చెప్పారు. రెండో ప్రపంచ యుద్ధంలో రష్యన్లు చేసిన త్యాగాలను గుర్తుచేసుకుంటూ, ఆ దేశ ప్రజలను ట్రంప్ ప్రశంసించారు. 2016 ఎన్నికల్లో రష్యా జోక్యం చేసుకుందనే ఆరోపణలను కొట్టిపారేశారు. అది తన రాజకీయ ప్రత్యర్థులు సృష్టించిన కుట్ర అని స్పష్టం చేశారు.
"నేను రష్యా ప్రజలను ప్రేమిస్తున్నా, అధ్యక్షుడు పుతిన్‌తో నాకు మంచి సంబంధాలు ఉన్నాయి." అని ట్రంప్ అన్నారు. కానీ యుద్ధం కొనసాగితే రష్యా భారీ ఆర్థిక నష్టాలను ఎదుర్కోవలసి వస్తుందని ట్రంప్ పుతిన్‌ను హెచ్చరించారు. శాంతి ఒప్పందం కుదరకపోతే, రష్యా వస్తువులపై అధిక సుంకాలు, పన్నులు, ఆంక్షలు విధిస్తానని అన్నారు. ఈ చర్యలు ఇప్పటికే కష్టాల్లో ఉన్న రష్యా ఆర్థిక వ్యవస్థను మరింత దిగజారుస్తాయని ట్రంప్ పేర్కొన్నారు.
"నేను రష్యాకు, అధ్యక్షుడు పుతిన్‌కు ఒక పెద్ద సహాయం చేయబోతున్నా. రష్యా ఆర్థిక వ్యవస్థ కుప్పకూలుతోంది. వెంటనే యుద్ధాన్ని ఆపండి." అని అన్నారు.
ట్రంప్ యుద్ధాన్ని విమర్శిస్తూనే బైడెన్ ప్రభుత్వం రష్యాపై విధించిన ఆంక్షలను గుర్తించారు. అయితే, తన విధానం మరింత వేగవంతమైనదని, పుతిన్‌ను త్వరగా చర్య తీసుకునేలా చేస్తుందని ట్రంప్ చెప్పుకొచ్చారు. తాను అధ్యక్షుడిగా ఉంటే ఒక్క రోజులో యుద్ధాన్ని ఆపగలనని ట్రంప్ పదేపదే చెబుతున్నారు. శాంతి చర్చల కోసం పుతిన్‌తో నేరుగా మాట్లాడేందుకు కూడా ఆయన సిద్ధంగా ఉన్నారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి