ట్రంప్ ప్రభుత్వం తీసుకొచ్చిన కొత్త ఉత్తర్వు దాదాపు 700 పదాలతో ఉంది. అధ్యక్ష ఎన్నికల సమయంలో ఇచ్చిన హామీని నిలబెట్టుకునేందుకే ట్రంప్ ఈ నిర్ణయం తీసుకున్నారని తెలుస్తోంది. కానీ, న్యాయ నిపుణులు మాత్రం ఇది సుదీర్ఘ న్యాయ పోరాటానికి దారితీస్తుందని అంటున్నారు. ఎందుకంటే, పుట్టిన గడ్డపై పౌరసత్వం అనేది అమెరికా రాజ్యాంగంలోని 14వ సవరణలో పొందుపరిచారు. అమెరికా భూభాగంలో పుట్టిన ప్రతి ఒక్కరికీ పౌరసత్వం ఉంటుందని ఆ సవరణ స్పష్టంగా చెబుతోంది.
డెమోక్రటిక్ అటార్నీ జనరల్‌లు, వలస హక్కుల కోసం పోరాడే సంస్థలు ఈ చట్టం చాలా స్పష్టంగా ఉందని, అధ్యక్షుడి ఉత్తర్వుతో మార్చడం కుదరదని వాదిస్తున్నారు. న్యూజెర్సీ అటార్నీ జనరల్ మాట్ ప్లాట్కిన్ మాట్లాడుతూ, "ఒక కలంతో అధ్యక్షుడు 14వ సవరణను చెరిపేయలేరు" అని తేల్చి చెప్పారు.
మరోవైపు, ట్రంప్ ప్రభుత్వం ఈ ఉత్తర్వును సమర్థించుకుంది. ఈ కేసులను రాజకీయ కుట్రగా అభివర్ణించింది. వైట్ హౌస్ డిప్యూటీ ప్రెస్ సెక్రటరీ హారిసన్ ఫీల్డ్స్ మాట్లాడుతూ, "రాడికల్ లెఫ్టిస్టులు ప్రజల అభిష్టానికి వ్యతిరేకంగా పోరాడతారు లేదా అధ్యక్షుడితో కలిసి పనిచేస్తారు" అని అన్నారు.
కనెక్టికట్ అటార్నీ జనరల్ విలియం టాంగ్, చైనా అమెరికన్, పుట్టుకతోనే అమెరికన్ సిటిజన్. ట్రంప్ తీసుకున్న ఈ నిర్ణయాన్ని ఆయన తీవ్రంగా విమర్శించారు. 14వ సవరణ ప్రకారం అమెరికాలో పుట్టిన ఎవరైనా అమెరికన్లే అని ఆయన స్పష్టం చేశారు. ట్రంప్ చర్య తనలాంటి ఎన్నో కుటుంబాలను ఇబ్బంది పెడుతుందని ఆవేదన వ్యక్తం చేశారు.
కెనడా, మెక్సికోతో సహా దాదాపు 30 దేశాలు పుట్టిన గడ్డపై పౌరసత్వ విధానాన్ని అనుసరిస్తున్నాయి. మిగతా దేశాలు తల్లిదండ్రుల జాతీయత ఆధారంగా లేదా కఠినమైన నిబంధనలతో పౌరసత్వం ఇస్తున్నాయి. ట్రంప్, ఆయన మద్దతుదారులు మాత్రం పుట్టిన గడ్డపై పౌరసత్వానికి కఠిన నిబంధనలు ఉండాలని వాదిస్తున్నారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి