విజయసాయిరెడ్డి రాజీనామా అంశం ప్రస్తుతం ఏపీ రాజకీయాల్లో హాట్ టాపిక్‌గా మారింది. రాజీనామా అనంతరం ఆయన మీడియాతో మాట్లాడుతూ.. భవిష్యత్తులో ఏ రాజకీయ పార్టీలో చేరబోనని స్పష్టం చేశారు. జగన్‌కు మంచి జరగాలని కోరుకుంటున్నానని చెప్పడంతో పాటు చంద్రబాబు, పవన్ కళ్యాణ్, అమిత్ షాలకు తాను వ్యతిరేకం కాదని కూడా పేర్కొనడం గమనార్హం. ఇంతకాలం తనను ఉన్నత పదవిలో గౌరవించిన జగన్‌కు కృతజ్ఞతలు తెలుపుతూ, ఇకపై వ్యవసాయంపై దృష్టి సారిస్తానని ఆయన వెల్లడించారు.
ఈ పరిణామం వైసీపీకి, ముఖ్యంగా జగన్‌కు ఎదురుదెబ్బ అని కొందరు విశ్లేషిస్తుంటే, మరికొందరు మాత్రం ఇది ముమ్మాటికీ వ్యూహాత్మక ఎత్తుగడేనని వాదిస్తున్నారు. పార్టీ అధినేత వైఎస్ జగన్ విదేశీ పర్యటనలో ఉండగా ఈ పరిణామం చోటుచేసుకోవడం అనేక అనుమానాలకు తావిస్తోంది. గతంలో చంద్రబాబు అధికారం కోల్పోయిన సమయంలో కూడా ఇలాంటి వ్యూహమే అమలు చేశారని గుర్తు చేస్తున్నారు. అప్పట్లో టీడీపీకి చెందిన సుజనా చౌదరి, సీఎం రమేష్, టీజీ వెంకటేష్ వంటి ముఖ్య నేతలు చంద్రబాబు విదేశాల్లో ఉండగా బీజేపీలో చేరారు. ఆ తరువాత తిరిగి టీడీపీలో చేరి పదవులు పొందారు. ఇప్పుడు విజయసాయిరెడ్డి రాజీనామా కూడా అదే తరహా వ్యూహంలో భాగమేనా అనే అనుమానాలు బలపడుతున్నాయి. విజయసాయిరెడ్డితో పాటు మరికొందరు వైసీపీ నేతలు కూడా రాజీనామా చేసే అవకాశం ఉందని ఊహాగానాలు వినిపిస్తున్నాయి.
ఇంతకీ ఈ వ్యూహం వెనుక అసలు కారణం ఏమై ఉంటుంది? ప్రస్తుతం రాజ్యసభలో వైసీపీ బలంగా ఉంది. కేంద్రంలో బీజేపీకి రాజ్యసభలో మద్దతు అవసరమైన సమయంలో వైసీపీ సహకారం అందించింది. ఇప్పుడు కూటమి ప్రభుత్వం ఏర్పడిన నేపథ్యంలో బీజేపీకి నేరుగా వైసీపీ మద్దతు ఇచ్చే పరిస్థితి లేదు. అందుకే విజయసాయిరెడ్డితో పాటు మరికొందరు రాజీనామా చేస్తే, ఆ స్థానాలు బీజేపీ లేదా కూటమి ఖాతాలోకి వెళ్లే అవకాశం ఉంది. గతంలో కూడా వైసీపీకి చెందిన ముగ్గురు రాజ్యసభ సభ్యులు రాజీనామా చేయగా, అందులో రెండు స్థానాలు బీజేపీకి, ఒకటి టీడీపీకి దక్కాయి. దీన్ని బట్టి చూస్తే, వైసీపీ పరోక్షంగా తన బలాన్ని తగ్గించుకుని బీజేపీ లేదా కూటమి బలాన్ని పెంచే ప్రయత్నం చేస్తోందా అనే సందేహాలు కలుగుతున్నాయి. ఈ విధంగా బీజేపీకి పరోక్ష మద్దతు ఇవ్వడం ద్వారా వైసీపీ రాజకీయంగా లబ్ది పొందాలని చూస్తోందా అనే ప్రశ్నలు ఉత్పన్నమవుతున్నాయి.
మరోవైపు విజయసాయిరెడ్డి రాజీనామాపై వైసీపీ పార్టీ కానీ, ముఖ్యంగా జగన్ మోహన్ రెడ్డి ఇంకా స్పందించకపోవడం అనేక అనుమానాలకు తావిస్తోంది. గతంలో ఇతర ఎంపీలు రాజీనామా చేసినప్పుడు జగన్ వెంటనే స్పందించారు. కానీ ఇప్పుడు మౌనం వహించడం వెనుక బలమైన కారణం ఉండి ఉంటుందని రాజకీయ విశ్లేషకులు భావిస్తున్నారు. ఢిల్లీ నుంచి ఒత్తిడి ఉండటం లేదా పార్టీలో అంతర్గత కారణాలు ఏమైనా ఉండొచ్చని ఊహాగానాలు వినిపిస్తున్నాయి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి