ప్రముఖ బుర్రకథ కళాకారుడు మిరియాల అప్పారావుకు మరణానంతరం పద్మశ్రీ పురస్కారం లభించింది. కొద్ది రోజులుగా అనారోగ్యంతో బాధపడుతున్న ఆయన ఇటీవల కన్నుమూశారు. ఆయన పెద్ద కర్మ జరుగుతున్న రోజే కేంద్ర ప్రభుత్వం ఆయనకు పద్మశ్రీ అవార్డును ప్రకటించింది. కోనసీమ జిల్లా రావులపాలెంకు చెందిన అప్పారావు చిన్నప్పటి నుంచే బుర్రకథ కళపై మక్కువ పెంచుకున్నారు. తన గాత్రంతో, కళతో వేలాది ప్రదర్శనలు ఇచ్చారు. సింగపూర్, కువైట్ వంటి విదేశాలలో కూడా ఆయన బుర్రకథ ప్రదర్శనలు ఇచ్చి తెలుగు కళా ఖ్యాతిని చాటారు. 'గానకోకిల', 'బుర్రకథ టైగర్' వంటి బిరుదులు అందుకున్న అప్పారావుకు పద్మశ్రీ పురస్కారం రావడం ఆయన కుటుంబ సభ్యులకు, శిష్యులకు కన్నీటి సంతోషాన్ని మిగిల్చింది.
ఇక అవధాన కళలో తనదైన ముద్ర వేసిన మాడుగుల నాగఫణిశర్మ గారికి కూడా పద్మశ్రీ పురస్కారం లభించింది. అనంతపురం జిల్లా పుట్లూరు మండలం కడపకు చెందిన నాగఫణిశర్మ గారు 50 ఏళ్లుగా అవధాన కళకు సేవ చేస్తున్నారు. 19 ఏళ్ల వయసులోనే శతావధానం చేసి అందరినీ ఆశ్చర్యపరిచారు. రెండు వేలకు పైగా అవధానాలు, 27 శతావధానాలు, ఒక సహస్రావధానం, ఒక ద్విసహస్రావధానం చేసిన ఘనత ఆయన సొంతం. తెలుగు, సంస్కృతం భాషల్లో సహస్రావధానం చేసిన ఏకైక కవిగా ఆయన రికార్డు సృష్టించారు. మాజీ ప్రధానులు పీవీ నరసింహారావు, వాజ్‌పేయీ వంటి మహానుభావుల సమక్షంలో అవధానాలు చేసి ప్రశంసలు అందుకున్నారు. 'అవధాన సహస్రఫణి', 'శతావధాని సామ్రాట్' వంటి బిరుదులు ఆయన కీర్తి కిరీటంలో కలికితురాయిలు.
పద్మశ్రీ పురస్కారం అందుకున్న మరో తెలుగు ప్రముఖుడు ఆర్థికవేత్త ప్రొఫెసర్ కేఎల్ కృష్ణ. కృష్ణా జిల్లా ఉంగుటూరుకు చెందిన ఈ 90 ఏళ్ల వృద్ధుడు ఆర్థిక శాస్త్రంలో తనదైన ముద్ర వేశారు. దేశ విదేశాల్లోని అనేక విశ్వవిద్యాలయాల్లో ఆయన ప్రొఫెసర్‌గా, డైరెక్టర్‌గా, పరిశోధకుడిగా పనిచేశారు. ప్రభుత్వ, ప్రైవేట్ సంస్థలకు ఛైర్మన్‌గా, అధ్యక్షుడిగా సేవలు అందించారు. ఆర్థిక అసమానతలు, పారిశ్రామిక ఆర్థిక శాస్త్రంపై ఆయన చేసిన పరిశోధనలు ఎన్నో. 30కి పైగా పరిశోధన పత్రాలు సమర్పించారు.
ఈ విధంగా పద్మ పురస్కారాలలో ఆంధ్రప్రదేశ్‌కు సముచిత స్థానం లభించింది. మిరియాల అప్పారావు, మాడుగుల నాగఫణిశర్మ, కేఎల్ కృష్ణ వంటి తెలుగు తేజాలకు పద్మశ్రీ పురస్కారాలు దక్కడం తెలుగు ప్రజలకు గర్వకారణం.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి