ఇంకా, కాంగ్రెస్ పార్టీ నుంచి మాజీ సీఎం షీలా దీక్షిత్ కుమారుడు సందీప్ దీక్షిత్ కూడా ఈ స్థానం నుంచి పోటీ చేస్తున్నారు. 2013లో సందీప్ దీక్షిత్‌ను అరవింద్ కేజ్రీవాల్ ఓడించారు. ప్రస్తుతానికి అందుతున్న సమాచారం ప్రకారం బీజేపీ 44 స్థానాల్లో, ఆప్ 26 స్థానాల్లో ఆధిక్యంలో ఉంది. కాంగ్రెస్ మాత్రం కేవలం ఒక్క స్థానంలోనే ముందంజలో ఉంది.
ఢిల్లీ లిక్కర్ పాలసీ కేసు కారణంగా ఆమ్ ఆద్మీ పార్టీ ఈ ఎన్నికల్లో తీవ్రమైన సవాలును ఎదుర్కొంది. సీఎం పదవికి అరవింద్ కేజ్రీవాల్ రాజీనామా చేయాల్సి వచ్చింది. అవినీతి ఆరోపణలపై ఆయనతో పాటు డిప్యూటీ సీఎం మనీష్ సిసోడియా కూడా నెలల తరబడి జైలు జీవితం గడపాల్సి వచ్చింది.
అయితే, ఎన్నికల ప్రచారంలో మాత్రం ఆప్, బీజేపీ రెండు పార్టీలు కూడా ఢిల్లీలో మెరుగైన ప్రభుత్వ పాఠశాలలు, ఉచిత వైద్య సేవలు అందిస్తామని హామీలు ఇచ్చాయి. ఈరోజు సాయంత్రానికి ఎన్నికల ఫలితాలు పూర్తిగా తేలిపోనున్నాయి. ఆప్ నాలుగోసారి ఢిల్లీ పీఠాన్ని కైవసం చేసుకుంటుందా? లేక దాదాపు 30 ఏళ్ల తర్వాత బీజేపీ మళ్లీ అధికారంలోకి వస్తుందా? అనేది చూడాలి.
ఢిల్లీలోని 70 నియోజకవర్గాల్లో ఉదయం 8 గంటలకు ఓట్ల లెక్కింపు ప్రారంభమైంది. ఎగ్జిట్ పోల్స్ మాత్రం బీజేపీ విజయం సాధిస్తుందని అంచనా వేస్తున్నాయి. బీజేపీ 45–55 స్థానాల్లో గెలుపొందుతుందని చెబుతున్నాయి. ఆప్ మాత్రం సీట్లు కోల్పోవచ్చని, కాంగ్రెస్ పార్టీ ఒక్క సీటుకు మాత్రమే పరిమితం కావచ్చని అంచనా వేస్తున్నాయి.
ఆమ్ ఆద్మీ పార్టీ గత కొన్నేళ్లుగా ఢిల్లీ ఎన్నికల్లో తిరుగులేని ఆధిపత్యం చెలాయిస్తోంది. 2013 ఎన్నికల్లో బీజేపీ 31 స్థానాలు గెలుచుకున్నా 36 స్థానాల మెజారిటీకి దూరంగా నిలిచింది. ఆప్ 28 స్థానాల్లో విజయం సాధించగా, కాంగ్రెస్ 8 స్థానాలకు పరిమితమైంది. ఆ తర్వాత ఆప్, కాంగ్రెస్ కలిసి ప్రభుత్వాన్ని ఏర్పాటు చేశాయి. కానీ, అది కేవలం 49 రోజులు మాత్రమే కొనసాగింది. ఆపై రాష్ట్రపతి పాలన విధించారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి