జపాన్ కొత్తగా తీసుకొచ్చిన ఈ నోట్లలో 3D హోలోగ్రామ్‌లు ఉన్నాయట. దీంతో ఎవరైనా దొంగనోట్లు తయారు చేయాలని చూస్తే వెంటనే పట్టుబడిపోతారు. సాధారణంగా హోలోగ్రామ్‌లను కాపీ చేయడం చాలా కష్టం. అలాంటిది ఈ 3D హోలోగ్రామ్‌లను కాపీ చేయడం దాదాపు అసాధ్యం అంటున్నారు నిపుణులు. దీంతో జపాన్‌లో ఇకపై దొంగనోట్ల బెడద ఉండదనే చెప్పొచ్చు.
ప్రధాని కిషిదా ఈ కొత్త నోట్లను చూసి ఫిదా అయిపోయారు. వాటిని చారిత్రాత్మకం అని కొనియాడారు. అంతేకాదు, ఈ నోట్లు జపాన్ ఆర్థిక వ్యవస్థను మరింత ముందుకు తీసుకెళ్తాయని ఆయన ధీమా వ్యక్తం చేశారు. ప్రజలు కూడా ఈ నోట్లను ఇష్టపడతారని ఆయన ఆశాభావం వ్యక్తం చేశారు.
ఇంతకీ ఈ కొత్త నోట్లపై ఎవరి బొమ్మలు ఉన్నాయంటే.. 10,000 యెన్ నోటుపై జపనీస్ పెట్టుబడిదారీ విధాన పితామహుడుగా పేరుగాంచిన ఈయిచి షిబుసావా బొమ్మ ఉంది. ఆయన జపాన్ ఆర్థిక వ్యవస్థను గాడిలో పెట్టడంలో కీలక పాత్ర పోషించారు. 5,000 యెన్ నోటుపై మహిళా హక్కులు, విద్య కోసం పోరాడిన ఉమేకో త్సుడా బొమ్మను ముద్రించారు. ఆమె జపాన్‌లో మహిళల కోసం ఒక పెద్ద కాలేజీని స్థాపించారు. 1,000 యెన్ నోటుపై వైద్యుడు, బాక్టీరియాలజిస్ట్ అయిన షిబాసాబురో కితాసాటో బొమ్మ ఉంది. ఆయన టెటానస్, బుబోనిక్ ప్లేగు వ్యాధులపై చాలా పరిశోధనలు చేశారు.
నోట్ల వెనుక డిజైన్లు కూడా అదిరిపోయాయి. 10,000 యెన్ నోటు వెనుక టోక్యో స్టేషన్ బొమ్మ, 5,000 యెన్ నోటు వెనుక విస్టేరియా పువ్వులు, 1,000 యెన్ నోటు వెనుక మౌంట్ ఫుజీ (ఉకియో-ఇ కళాకారుడు కట్సుషికా హోకుసాయ్ వేసిన చిత్రం) బొమ్మలు ఉన్నాయి. ఇంకా పెద్దవాళ్లు కూడా ఈజీగా చదివేలా నోట్లపై అక్షరాలను పెద్దగా ముద్రించారు.
ప్రపంచమంతా డిజిటల్ పేమెంట్స్ వైపు వెళ్తున్నా.. జపాన్‌లో మాత్రం ఇప్పటికీ క్యాష్ వినియోగం ఎక్కువగానే ఉంది. డిజిటల్ లావాదేవీలు పెరుగుతున్నా.. క్యాష్ ఎప్పుడైనా, ఎక్కడైనా చెల్లింపులు చేయడానికి నమ్మకమైన మార్గమని బ్యాంక్ ఆఫ్ జపాన్ గవర్నర్ కాజువో ఉయేదా అన్నారు. ఏదేమైనా జపాన్ తీసుకొచ్చిన ఈ కొత్త నోట్లు ఇప్పుడు హాట్ టాపిక్‌గా మారాయి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి