కిషన్ రెడ్డి మాట్లాడుతూ, కాంగ్రెస్, బీఆర్ఎస్, మజ్లీస్ కలిసి బీజేపీని ఓడించాలని కుమ్మక్కయ్యాయని విమర్శించారు. రేవంత్ రెడ్డి, కేసీఆర్ ఓవైసీ కనుసన్నల్లో నడుస్తున్నారని, ఓటు బ్యాంకు రాజకీయాల కోసం హైదరాబాద్ ప్రజలను బలిపశువులుగా చేస్తున్నారని ఆగ్రహం వ్యక్తం చేశారు. బీఆర్ఎస్ ప్రభుత్వం రియల్ ఎస్టేట్ వ్యాపారులకు అనుకూలంగా మాత్రమే అభివృద్ధి చేసిందని, జీహెచ్ఎంసీ నిధులు సరిగా వినియోగించబడలేదని ఆరోపించారు.
మజ్లీస్ విజయం సాధిస్తే నిజాం కాలం నాటి అణిచివేత పరిస్థితులు తిరిగి వస్తాయని కిషన్ రెడ్డి హెచ్చరించారు. రజాకార్ల వారసత్వాన్ని కొనసాగిస్తున్న మజ్లీస్‌ను ఓడించడానికి కార్పొరేటర్లు, ప్రజలు ఐక్యంగా ముందుకు రావాలని పిలుపునిచ్చారు. హైదరాబాద్ ఎమ్మెల్సీ ఎన్నికల్లో బీజేపీ విజయం సాధిస్తుందని ధీమా వ్యక్తం చేశారు. కేంద్రంలో మోదీ హయాంలో ఆర్థిక, పన్ను సంస్కరణలు హైదరాబాద్‌కు పరిశ్రమలను తెచ్చాయని, డబుల్ ఇంజన్ సర్కార్ వస్తేనే హైదరాబాద్ అభివృద్ధి సాధ్యమని తెలిపారు. హైదరాబాద్ కేవలం హైటెక్ సిటీ మాత్రమే కాదు, అంబర్‌పేట, నాంపల్లి వంటి ప్రాంతాలను కూడా అభివృద్ధి చేయాలని సూచించారు.
కాంగ్రెస్, బీఆర్ఎస్‌లు తమ స్వతంత్రతను నిరూపించుకోవాల్సిన అవసరం బీజేపీకి లేదని, కేటీఆర్ సర్టిఫికెట్ అవసరం లేదని కిషన్ రెడ్డి స్పష్టం చేశారు. కేసీఆర్ కాంగ్రెస్‌లో పుట్టి, కేంద్ర, రాష్ట్ర ప్రభుత్వాల్లో భాగస్వామ్యం అయ్యారని, రాహుల్ గాంధీ ఫోన్ చేస్తే కేసీఆర్ ప్రత్యేక విమానంలో వెళతారని విమర్శించారు. పోలింగ్ జరిగే 23వ తేదీ వరకు ప్రజలు, కార్పొరేటర్లు అప్రమత్తంగా ఉండి, మజ్లీస్‌కు ఓటు వేయకుండా బీజేపీకి మద్దతివ్వాలని కోరారు. హైదరాబాద్‌ను రక్షించుకోవడానికి అందరూ ఐక్యంగా పనిచేయాలని, మజ్లీస్ ఓటు బ్యాంకు రాజకీయాలను తిప్పికొట్టాలని సూచించారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి