విరాట్ కోహ్లీ, రోహిత్ శర్మ దిగ్గజ బ్యాట్స్‌మెన్లు అని చెప్పడంలో ఎలాంటి అతిశయోక్తి లేదు. వీరిద్దరూ టీమిండియాకి చాలా కీలకం అని చెప్పవచ్చు. వీళ్లు బాగా ఆడితేనే ఇండియా గెలిచే అవకాశాలు ఉన్నాయి. ఇటీవల ముంబైలో న్యూజిలాండ్‌తో జరిగిన మూడవ టెస్ట్ మ్యాచ్లో ఇద్దరూ తమ రెండవ ఇన్నింగ్స్‌లో త్వరగా ఔట్ అయిపోయారు. సొంత గడ్డపై పూర్తిగా చేతులు ఎత్తేయడం అభిమానులందరికీ తీవ్ర నిరాశను కలిగించింది. సాధారణంగా భారతదేశంలో టెస్ట్ మ్యాచ్‌లు ఎక్కువగా స్పిన్ బౌలర్లకు అనుకూలంగా ఉంటాయి. ఎందుకంటే ఇక్కడి పిచ్‌లు చాలా పొడిగా ఉంటాయి. ఇదే కారణంగా భారతదేశం టెస్ట్ క్రికెట్‌లో చాలా మంచి ఫలితాలు సాధిస్తోంది.
అంతేకాకుండా, భారతీయ బ్యాట్స్‌మెన్లు, ముఖ్యంగా విరాట్ కోహ్లీ, రోహిత్ శర్మ భారీ స్కోర్లు చేయడం వల్ల భారతదేశం మరింత బలపడుతోంది. కానీ ఈ సీజన్‌లో ఈ ఇద్దరు స్టార్ బ్యాట్స్‌మెన్లు తమ ప్రతిభను చూపించలేకపోయారు. భారత క్రికెట్ జట్టు హోమ్ గ్రౌండ్ లో ఎప్పుడూ ఓడిపోదు అనే ఒక భావన ఇప్పుడు చెదిరిపోయింది. న్యూజిలాండ్ జట్టు పూణెలో జరిగిన రెండవ టెస్టు మ్యాచ్లో భారత్‌ను ఓడించింది. అంతేకాకుండా, బెంగళూరులో జరిగిన మొదటి టెస్టు మ్యాచ్లో భారత జట్టు కేవలం 46 పరుగులకే ఆలౌట్ అయింది. ఇది ఇండియన్ టీం హోమ్ గ్రౌండ్ లో చేసిన అతి తక్కువ స్కోరు.
రోహిత్ శర్మ చివరిగా 2024, మార్చిలో ఇంగ్లాండ్‌తో జరిగిన మ్యాచ్లో సెంచరీ సాధించాడు. ఆ సీజన్‌లో ఆయన చాలా బాగా ఆడాడు. కానీ ఈ సీజన్‌లో ఈ హిట్ మ్యాన్ పెద్దగా రాణించలేకపోయాడు. ఐదు మ్యాచ్‌లలో పది ఇన్నింగ్స్‌ ఆడి కేవలం 133 పరుగులు మాత్రమే చేశాడు. అంటే, ప్రతి ఇన్నింగ్స్‌కు సగటున 13.30 పరుగులు మాత్రమే చేశాడు. ఆయన అత్యధిక స్కోరు 52.
విరాట్ కోహ్లీ కూడా ఈ సీజన్‌లో అంతగా రాణించలేదు. ఐదు మ్యాచ్‌లలో పది ఇన్నింగ్స్‌ ఆడి 192 పరుగులు మాత్రమే చేశాడు. అంటే, ప్రతి ఇన్నింగ్స్‌కు సగటున 21.33 పరుగులు మాత్రమే చేశాడు. ఆయన హైయెస్ట్ స్కోరు 70. విరాట్ కోహ్లీ చివరి టెస్ట్ శతకం 2023 జూలైలో వెస్టిండీస్‌తో జరిగిన మ్యాచ్లో పోర్ట్ ఆఫ్ స్పెయిన్ వేదికగా చేశాడు.
ఇద్దరు స్టార్ ఆటగాళ్ళైన విరాట్ కోహ్లీ, రోహిత్ శర్మ ఇటీవల కాలంలో తమ పర్ఫామెన్స్ దారుణంగా కోల్పోవడం భారత క్రికెట్ జట్టుకు పెద్ద సమస్యగా మారింది. ఎందుకంటే త్వరలోనే ఆస్ట్రేలియాతో ఐదు టెస్టు మ్యాచ్‌ల సిరీస్ ఆడాలి. అంటే, వచ్చే కొన్ని నెలల్లో వీరిద్దరి ఆట ఎలా ఉంటుందో చూడాలి. ఎందుకంటే వీరిద్దరి వయస్సు 35, 36 దాటింది. మరి వీరు ఇంకా టెస్ట్ క్రికెట్ ఆడగలరా అనేది చాలా పెద్ద ప్రశ్న. వీళ్లు ఎలాగో ఆడ లేకపోతున్నారు. చాలామంది వీళ్ళకి ఏమైంది అని కామెంట్స్ చేస్తున్నారు. ఇక రిటైర్‌మెంట్‌ బాట పట్టడం మంచిదని పలువురు సలహాలు ఇస్తున్నారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి