రెండో టీ20లో భారత్ కష్టాల్లో ఉన్నప్పుడు తిలక్ వర్మ క్రీజులోకి వచ్చాడు. 166 పరుగుల లక్ష్యంతో బరిలోకి దిగిన భారత్ ఒక దశలో తడబడింది. కానీ తిలక్ మాత్రం ఏ మాత్రం ఒత్తిడికి గురి కాకుండా నిలకడగా ఆడాడు. 55 బంతుల్లో 72 పరుగులు చేసి నాటౌట్‌గా నిలిచాడు. భారత్ విజయంలో కీలక పాత్ర పోషించాడు. దీంతో టీమిండియా రెండు వికెట్ల తేడాతో గెలిచి సిరీస్‌లో 2-0 ఆధిక్యంలోకి దూసుకెళ్లింది. మ్యాచ్ అనంతరం చోప్రా మాట్లాడుతూ.. తిలక్ వర్మ భారత జట్టుకు నమ్మకమైన మిడిలార్డర్ బ్యాటర్‌గా ఎదుగుతాడని అన్నాడు.
"మనం ఒక్కోసారి తొందరపడి ఎవరినో ఒకరిని సూపర్ స్టార్ అని అనేస్తాం. గ్రేట్, లెజెండ్ లాంటి పదాలను కూడా చాలా త్వరగా వాడేస్తుంటాం. తిలక్ ఇంకా సూపర్ స్టార్ కాదు. కానీ ఆ దిశగా మాత్రం కచ్చితంగా వెళ్తున్నాడు" అని చోప్రా అన్నాడు. లక్ష్య ఛేదనలో చివరి ఓవర్లలో ఒత్తిడి పెరిగినా తిలక్ చాలా తెలివిగా ఆడాడని చోప్రా మెచ్చుకున్నాడు. చివరికి రెండు వికెట్లు మాత్రమే మిగిలి ఉండగా 18 పరుగులు కావాల్సిన సమయంలో కూడా తిలక్ తొందరపడలేదు. అప్పటికే ఐదు సిక్స్‌లు కొట్టినా, మళ్లీ రిస్క్ చేయకుండా సింగిల్స్, డబుల్స్‌తో మ్యాచ్‌ను ముగించాడు. చెన్నైలోని చెపాక్ స్టేడియం ఎంఎస్ ధోనీకి హోమ్ గ్రౌండ్ అని, అక్కడ తిలక్ చూపించిన మెచ్యూరిటీ అద్భుతమని చోప్రా కొనియాడాడు.
ఇక భారత కెప్టెన్ సూర్యకుమార్ యాదవ్ కూడా జట్టు ఆటతీరుపై సంతోషం వ్యక్తం చేశాడు. "మేం దూకుడుగా ఆడుతూనే, చిన్న చిన్న భాగస్వామ్యాలు నెలకొల్పడం చాలా బాగుంది" అని సూర్య అన్నాడు. ఇంగ్లాండ్ కెప్టెన్ జోస్ బట్లర్ సైతం తిలక్ ఆటను ప్రశంసించాడు. "మ్యాచ్ చాలా ఉత్కంఠగా సాగింది. తిలక్‌కు క్రెడిట్ ఇవ్వాలి. అద్భుతంగా ఆడి ఇండియాను గెలిపించాడు" అని బట్లర్ అన్నాడు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి