తొలి మ్యాచ్ కరాచీలో న్యూజిలాండ్‌తో జరిగింది. విల్ యంగ్, టామ్ లాథమ్ సెంచరీలతో న్యూజిలాండ్ బ్యాటింగ్ విధ్వంసం సృష్టించింది. 320 పరుగులు కొట్టింది. పాకిస్థాన్ బ్యాటర్లు మాత్రం చేతులెత్తేశారు. 260 పరుగులకే కుప్పకూలారు. అంతేకాదు, గ్లెన్ ఫిలిప్స్ అద్భుతమైన ఒంటిచేతి క్యాచ్‌కు పాకిస్థాన్ కెప్టెన్ మహ్మద్ రిజ్వాన్ ఔట్ అవ్వడం పాక్ ఫ్యాన్స్‌కి మరింత షాకిచ్చింది. న్యూజిలాండ్ 60 పరుగుల తేడాతో పాకిస్థాన్‌ను చిత్తు చేసింది.
ఇక ఆ తర్వాత దుబాయ్‌లో దాయాది దేశం భారత్‌తో హై-వోల్టేజ్ మ్యాచ్ జరిగింది. పాకిస్థాన్ బ్యాటింగ్ ఎంచుకుని 241 పరుగులే చేసింది. టీమిండియా స్టార్ బ్యాటర్ విరాట్ కోహ్లీ అజేయ సెంచరీతో చెలరేగడంతో భారత్ ఆరు వికెట్ల తేడాతో పాక్‌ను ఓడించింది. ఓటమి తర్వాత కెప్టెన్ రిజ్వాన్ మాట్లాడుతూ.. మిడిలార్డర్ ఆటగాళ్లు ఒత్తిడిని తట్టుకోలేకపోయారని, బ్యాటింగ్ సరిగా ఆడలేదని ఒప్పుకున్నాడు. "మిడిలార్డర్ సరిగ్గా ఆడలేదు... షాట్ సెలక్షన్ కూడా సరిగ్గా లేదు" అని నిరాశగా అన్నాడు.
చివరి మ్యాచ్ రావల్పిండిలో బంగ్లాదేశ్‌తో జరగాల్సి ఉండగా.. వర్షం కారణంగా రద్దయింది. ఇరు జట్లకు ఒక్కో పాయింట్ ఇచ్చారు. దీంతో పాకిస్థాన్ ఒక్క విజయం కూడా లేకుండా టోర్నీ నుంచి నిష్క్రమించింది.
1996 తర్వాత మళ్లీ సొంతగడ్డపై ఐసీసీ టోర్నీ ఆడుతుండటంతో పాక్ ఫ్యాన్స్ భారీగా ఆశలు పెట్టుకున్నారు. కానీ, పాక్ జట్టు మాత్రం సొంత మైదానం, అభిమానుల మద్దతు ఉన్నా ఏమాత్రం రాణించలేకపోయింది. దీంతో విశ్లేషకులు, అభిమానులు తీవ్రంగా విమర్శిస్తున్నారు. సరైన వ్యూహాలు లేకపోవడం, బ్యాటింగ్ వైఫల్యం, ఫీల్డింగ్‌లో తప్పిదాలే పాకిస్థాన్ ఓటమికి కారణమని తేల్చారు.
2025 ఛాంపియన్స్ ట్రోఫీ పాకిస్థాన్ క్రికెట్ చరిత్రలో ఒక చేదు జ్ఞాపకంగా మిగిలిపోతుంది. దేశంలో క్రికెట్ అంటే ప్రాణం పెట్టే అభిమానులకు ఇది నిజంగా అవమానకరమైన విషయమే. పాకిస్థాన్ క్రికెట్ జట్టు తక్షణమే మేల్కొని, ఆటతీరును మెరుగుపరుచుకోవాల్సిన అవసరం ఎంతైనా ఉంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి