మన రైజర్స్ ఉన్న ఫామ్ చూస్తుంటే మాటల్లేవ్. ముఖ్యంగా రాజస్థాన్‌పై జరిగిన మ్యాచ్‌లో అయితే రికార్డుల మోత మోగించారు. SRH తరఫున అరంగేట్రంలోనే ఇషాన్ కిషన్ ఆడిన ఆట అదుర్స్. తన మొదటి ఐపీఎల్ సెంచరీతో చెలరేగిపోయాడు. మన టీమ్ ఏకంగా 286 పరుగులు చేసిందంటే కారణం అతనే. ఇది మన రాజీవ్ గాంధీ స్టేడియంలోనే అత్యధిక స్కోర్ కూడా. హెన్రిచ్ క్లాసెన్ కూడా క్లాస్ ఇన్నింగ్స్‌తో అదరగొట్టాడు. వీళ్లతో పాటు ట్రావిస్ హెడ్, అభిషేక్ శర్మ, నితీష్ కుమార్ రెడ్డి లాంటి హిట్టర్లు ఉండటంతో, SRH మరోసారి భారీ స్కోర్‌తో చెలరేగడానికి రెడీగా ఉంది.
లక్నో టీమ్ ఢిల్లీతో జరిగిన మ్యాచ్‌లో బాగానే ఆడినా, బౌలింగ్ ఇంకా కెప్టెన్సీ నిర్ణయాల విషయంలో కొంచెం తడబడింది. మిచెల్ మార్ష్, నికోలస్ పూరన్ బ్యాట్‌తో అదరగొట్టారు. కొత్త బంతితో శార్దూల్ ఠాకూర్ భలే బౌలింగ్ చేశాడు. కానీ, ఆ తర్వాత మళ్లీ అతన్ని బౌలింగ్‌కి తీసుకురాకపోవడం చాలామందికి ఆశ్చర్యం కలిగించింది, విమర్శలకు కూడా తావిచ్చింది. మన SRH లాంటి బలమైన టీమ్‌ను ఓడించాలంటే, లక్నో కచ్చితంగా బౌలింగ్‌లో, మైదానంలో తీసుకునే నిర్ణయాల్లో మెరుగవ్వాల్సిందే.
రాజీవ్ గాంధీ స్టేడియం పిచ్ బ్యాటింగ్‌కు స్వర్గధామం అని చెప్పొచ్చు. ఫ్లాట్‌గా ఉండే ఈ పిచ్‌పై పరుగులు చేయడం సులువు. అందుకే ఛేజింగ్ కూడా తేలికవుతుంది. గత మ్యాచ్‌లో SRH 286 కొట్టినా, రాజస్థాన్ కూడా 200 పైగా పరుగులు చేసిందంటే పిచ్ ఎంత బ్యాటింగ్‌కి అనుకూలంగా ఉందో అర్థం చేసుకోవచ్చు. పైగా, ఈ గ్రౌండ్‌లో SRHకి మంచి రికార్డు ఉంది. ఇక్కడ ఆడిన 58 మ్యాచ్‌లలో 36 గెలిచింది మన టీమ్.
గత రికార్డులు చూస్తే, SRH మీద లక్నో టీమ్‌దే పైచేయి. ఇప్పటివరకు ఆడిన 4 మ్యాచ్‌లలో 3 లక్నోనే గెలిచింది. కానీ, ప్రస్తుతం మన SRH ఉన్న ఫామ్ చూస్తుంటే, ఈసారి లెక్క సరిచేసే అవకాశం పుష్కలంగా ఉంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి