టాస్ గెలిచిన ఢిల్లీ కెప్టెన్ అక్షర్ పటేల్ ఫీల్డింగ్ ఎంచుకున్నాడు. ముంబై ఓపెనర్లు రోహిత్ శర్మ, ర్యాన్ రికెల్టన్ బరిలోకి దిగి పిచ్చ కొట్టుడు కొట్టారు. కేవలం 4 ఓవర్లలోనే 45 పరుగులు పిండేశారు. రికెల్టన్ అయితే వేరే లెవెల్లో ఆడాడు. 25 బంతుల్లోనే 41 రన్స్ కొట్టాడు, అందులో ఐదు ఫోర్లు, రెండు సిక్సులు ఉన్నాయి. కుల్దీప్ యాదవ్ వేసిన గూగ్లీకి రికెల్టన్ దొరికిపోవడంతో వాళ్ళ జోరుకి బ్రేక్ పడింది.
రోహిత్ శర్మ (18) తొందరగానే వెనుదిరిగినా, సూర్యకుమార్ యాదవ్, తిలక్ వర్మ కలిసి ఇన్నింగ్స్‌ను చక్కదిద్దారు. సూర్య రాగానే మొదటి బంతికే సిక్సర్ బాది తన ఉద్దేశం చెప్పేశాడు. 28 బంతుల్లో 40 రన్స్ చేసి కుల్దీప్ బౌలింగ్‌లోనే అవుటయ్యాడు. ఇక తిలక్ అయితే అసలు తగ్గలేదు. మిడిల్ వికెట్ మీదుగా స్టైలిష్ షాట్లు, కొత్త స్ట్రోక్స్‌తో స్కోర్‌బోర్డును పరుగులు పెట్టించాడు.
చివర్లో నమన్ ధీర్ కేవలం 17 బంతుల్లోనే 38* రన్స్ చేసి మెరుపులు మెరిపించాడు. కెప్టెన్ హార్దిక్ పాండ్యా మళ్ళీ 2 పరుగులకే అవుటైనా, ముంబై మాత్రం 205/5 భారీ స్కోరు చేసింది. వర్మ కేవలం 26 బంతుల్లోనే హాఫ్ సెంచరీ కొట్టాడు. అతని 59 పరుగుల ఇన్నింగ్స్‌లో ఆరు ఫోర్లు, మూడు సిక్సులు ఉండటం వల్లనే ముంబై 200 దాటగలిగింది.
ఢిల్లీ ఛేజింగ్ మొదలు పెట్టిందో లేదో మొదటి బంతికే జేక్ ఫ్రేజర్-మెక్‌గుర్క్ ఔట్ అయ్యాడు. కానీ కరుణ్ నాయర్ ఈ సీజన్‌లో మొదటి మ్యాచ్ ఆడుతూనే విధ్వంసం సృష్టించాడు. కేవలం 22 బంతుల్లోనే హాఫ్ సెంచరీ కొట్టేశాడు. బుమ్రా బౌలింగ్‌ను కూడా ఊచకోత కోశాడు.
నాయర్ ఆగకుండా స్కూప్స్, స్వీప్స్, భారీ షాట్లతో 89 పరుగులు పిండేశాడు. అభిషేక్ పోరెల్ కూడా 33 రన్స్ చేసి సహకరించాడు. 10 ఓవర్లు అయ్యేసరికి 113/1తో ఢిల్లీ మ్యాచ్ గెలిచేలా కనిపించింది.
కానీ ముంబై ఊరుకుంటుందా, మిచెల్ సాంట్నర్, కర్ణ్ శర్మ ఇద్దరూ కలిసి ఢిల్లీ పతనాన్ని శాసించారు. ఐదు వికెట్లు పడగొట్టారు. కరుణ్ నాయర్‌ను సాంట్నర్ బౌల్డ్ చేయడంతో సీన్ మొత్తం మారిపోయింది. ఢిల్లీ ఆరు ఓవర్లలో ఐదు వికెట్లు కోల్పోయింది. వాళ్ళ మెయిన్ బ్యాట్స్మన్ అవుట్ కావడంతో ఇక తేరుకోలేకపోయింది.
ముంబైకి ఈ గెలుపు కేవలం రెండు పాయింట్లు మాత్రమే కాదు, ఒక నైతిక విజయం. ఇకపై అన్నీ మనకే అనుకూలంగా జరుగుతాయి అనే నమ్మకం వచ్చింది. తిలక్ వర్మ హాఫ్ సెంచరీ కొట్టడం వల్ల ముంబై మంచి స్కోరు చేయడమే కాకుండా, అతని ఫిఫ్టీ కొడితే ఓడిపోతాం అనే సెంటిమెంట్‌కు కూడా ఎండ్ కార్డ్ పడింది.
ఫీల్డింగ్ మెరుగుపడింది, బౌలింగ్ డెత్ ఓవర్లలో కరెక్ట్‌గా వేశారు, మిడిల్ ఆర్డర్ ఫామ్‌లోకి వచ్చింది. ఈ ఐపీఎల్ సీజన్‌లో ముంబై ఇంకా గట్టిగా పోరాడగలదు అని ఈ మ్యాచ్ చూపించింది. ముఖ్యంగా, తిలక్ ఫిఫ్టీ ఇకపై బ్యాడ్ లక్ కాదు, గుడ్ లక్ అని చెప్పడానికి ఒక సింబల్.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి